នេះជាកម្រងប្រវត្តិ មនុស្សល្បីៗនៅកម្ពុជា។ ការរៀបចំឯកសារនេះមានបំណងធ្វើជា Chronology កាលប្រវត្តិបែបសង្ខេបផង និងមានជា ឯកសារយោងផង។ ការដែល ចម្លងពី គេមកនេះ (Copy, Cut, Pass) ដោយសារតែនៅស្រុកខ្មែរកំពុងស្ថិតក្នុងសង្រ្គាមពត៍មាន Cyber War/Information War ឧ ធី សុវណ្ណថា បម្រើបក្សប្រឆាំង ដូច្នេះសារពត៍មានបក្សប្រឆាំងគេ ឡង់សេ ផ្សព្វផ្សាយជូននាង ដល់ពេល ធី សុវណ្ណថា មកបម្រើរាជការខ្មែរវិញ (ជាតិ សាសនា ព្រះមហាក្សត្រ) សារពត៍មានបក្សប្រឆាំង បែរជា Remove ចោលអស់ !!! នេះជាមូលហេតុ ខ្ញុំបាទ ចម្លងទុកទាំងស្រុង !!!
2014-02-22 តើកញ្ញា ធី សុវណ្ណថា ជានរណា?យុវជនស្ម័គ្រចិត្តនៃគណបក្សសង្គ្រោះជាតិ កញ្ញា ធី សុវណ្ណថា ជាសកម្មជននយោបាយវ័យក្មេងដ៏កម្រមួយរូបនៅក្នុងសង្គមកម្ពុជា។ ក្រៅតែពីបានចូលរួមជួយឃោសនារកសំឡេងគាំទ្រអោយគណបក្សសង្គ្រោះជាតិ និងចូលប្រឡូកយ៉ាងសកម្មក្នុងមហាបាតុកម្មតវ៉ាលទ្ធផលបោះឆ្នោតរបស់គណបក្សប្រឆាំងនៅក្រោយការបោះឆ្នោតឆ្នាំ២០១៣ កញ្ញា ធី សុវណ្ណថា ក៏បានធ្វើកិច្ចការមនុស្សធម៌ជាច្រើនទៀតដែរ។
09 August 2014 ធី សុវណ្ណថា ត្រូវឪពុកម្តាយទម្លាយរឿងពិត ទះចាក់បេតុងទំហំប្រមាណ៣គុណនឹង៤ម៉ែត្រដ៏កញ្ចាស់មួយដែលមើលទៅមានស្ថានភាពបាក់បែកជាអន្លើ ទ្វារឈើកាន់តែទ្រុឌទ្រោម ស្ថិតនៅក្នុងប្លុកផ្សារត្រីនៃផ្សារក្រុងសួង ខេត្តត្បូងឃ្មុំ (ពីមុនខេត្តកំពង់ចាម) ត្រូវបានបុរសម្នាក់ រួមជាមួយនឹងអ្នកលក់ដូរមួយចំនួនទៀតបានធ្វើការអះអាងថា ផ្ទះដ៏តូចចង្អៀតមួយនោះហើយជាកន្លែងដែលតារានយោបាយរះថ្មី នាង ធី សុវណ្ណថា បានចាប់កំណើត។ កំពុងអង្គុយធ្វើគ្រឿងអលង្ការកាឡៃ ដែលមានជញ្ជាំងជាប់ៗគ្នានឹងអតីតផ្ទះរបស់ ធី សុវណ្ណថា បុរសសម្បុរស្រគាំម្នាក់ឈ្មោះ រ៉េត សុខម៉េង ដែលគេគ្រប់គ្នាដឹងថាជាពូបង្កើតរបស់ ធី សុវណ្ណថា បាននិយាយទាំងអារម្មណ៍ភ្ញាក់ផ្អើលនៅពេល ភ្នំពេញ ប៉ុស្តិ៍ សុំធ្វើបទសម្ភាសភ្លាមៗថា៖«ផ្ទះនេះជាកន្លែងដែល សុវណ្ណថា បានកើត ព្រោះកាលពីមុនឪពុកម្តាយរបស់នាងជាអ្នករកស៊ីលក់ដូរគ្រឿងមាស គ្រឿងប្រាក់ ប្លាទីន និងប្តូរលុយនៅទីនេះ»។ តាមលោក រ៉េត សុខម៉េង និងប្រជាពលរដ្ឋនៅទីនោះ បានឲ្យដឹងថា ពីមុនគ្រួសាររបស់ ធី សុវណ្ណថា មានផ្ទះពីរកន្លែងស្ថិតនៅក្នុងភូមិសួងលិច ឃុំសួង ស្រុកត្បូងឃ្មុំ ខេត្តកំពង់ចាម(បច្ចុប្បន្នក្រុងសួង ខេត្តត្បូងឃ្មុំ)។
លោក សុខម៉េង បន្តថា៖«តាមពិតគាត់មានផ្ទះពីរ។ នៅក្រៅផ្សារគាត់មានផ្ទះឈើមួយល្វែង(ទំហំ៥គុណ១៨) ប៉ុន្តែនៅពេលនេះលក់ឲ្យគេ គេធ្វើផ្ទះថ្មបាត់ទៅហើយ ហើយផ្ទះមួយនេះ បងស្រីខ្ញុំជាអ្នកគ្រប់គ្រង តែបានដាក់ជួលឲ្យគេ»។ ទោះបីជាទាំងគ្រួសារ ធី សុវណ្ណថា និងអ្នកផ្សារមួយចំនួនអះអាងថា ធី សុវណ្ណថា ពិតជាមានកំណើតនៅទឹកដីផ្សារសួងក៏ដោយ ប៉ុន្តែអាជ្ញាធរភូមិឃុំ រួមទាំងមន្ត្រីប៉ូលិសនៅក្រុងសួងហាក់មិនបានដឹងរឿងនោះទេ។ លោក សុខ ឈាន អធិការស្តីទីក្រុងសួង បាននិយាយថា៖«ទេចំពោះប្រវត្តិក្មេងស្រី និងគ្រួសារគេ ខ្ញុំដូចជាមិនដឹងទេ ហើយខ្ញុំក៏បានបោះដៃសួរគ្រប់កន្លែងដែរ ប៉ុន្តែដូចជាគ្មានអ្នកណាដឹង»។
ទោះយ៉ាងណា លោកអធិការរង រួមជាមួយនឹងមេភូមិទាំង១៥រូបស្ថិតនៅក្នុងសង្កាត់សួង ព្រមទាំងប្រជាពលរដ្ឋបានលើកឡើងថា ការបាត់ព័ត៌មានពីគ្រួសារមួយនេះ ទំនងដោយសារតែគ្រួសារពួកគេបានធ្វើចំណាកស្រុកទៅរស់នៅភ្នំពេញយូរឆ្នាំពេក ស្របពេលអាជ្ញាធរគ្រប់គ្រងខេត្តបានផ្លាស់ប្តូរតំណែងជាបន្តបន្ទាប់។ លោក រ៉េត សុខម៉េង បាននិយាយថា៖«បើតាមខ្ញុំចាំគឺបងស្រីខ្ញុំ សុគុណ និងគ្រួសារគាត់បានលក់ផ្ទះសម្បែង និងបានចាកចេញពីសួងតាំងពីឆ្នាំ២០០៣មកម្ល៉េះ នៅពេលនោះ សុវណ្ណថា ទើបតែមានអាយុ៧-៨ ឆ្នាំប៉ុណ្ណឹង»។ នៅក្នុងអំឡុងពេលរស់នៅក្រុងសួងលោក សុខម៉េង បានកត់សម្គាល់ឃើញថា កុមារី ធី សុវណ្ណថា ដែលពេលនេះមានអាយុ១៩ឆ្នាំ ហើយនោះ គឺជាក្មេងវៃឆ្លាត តែច្រឡឺម ហើយគេជាក្មេងដែលចង់ដឹង ចង់ឮ ប៉ិនឆ្ងល់ និងពូកែសួរនាំច្រើន។
ជាមួយគ្នានោះ ក្មេងស្រីដែលមានចរិតក្លាហានតាំងពីតូចនាង ធី សុវណ្ណថា បានឲ្យដឹងថា ដោយសារតែឪពុកម្តាយនាងមានបងប្អូន ពិសេសយាយតានៅភ្នំពេញច្រើន ដូច្នេះឪពុកម្តាយនាងក៏បោះបង់អាជីពជាអ្នកលក់ប្លាទីន មាស ប្រាក់ ហើយសម្រេចចិត្តវេចសម្ពាយមកស្វែងរករបរថ្មីនៅភ្នំពេញ ក្នុងនាមជាជាងដេរ បោះដុំសម្លៀកបំពាក់ និងផ្គត់ផ្គង់អំបោះសម្រាប់រោងចក្រកាត់ដេរនាពេលបច្ចុប្បន្ន សព្វថ្ងៃនេះ គ្រួសាររបស់ ធី សុវណ្ណថា បានផ្លាស់ប្តូរជីវភាពកាន់តែប្រសើរជាមួយនឹងផ្ទះវីឡាល្វែងមួយកន្លែងមាន៤ជាន់ មានដីឡូត៍ធំគួរសមស្ថិតនៅផ្ទះលេខ២៧០ ផ្លូវ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ ភ្នំពេញ។ ផ្ទះរបស់អ្នកនយោបាយវ័យក្មេងរូបនេះ មានរថយន្តពីរគ្រឿង និងម៉ូតូ២គ្រឿង។ រថយន្តឡិចស៊ីស ៣៣០ និងរថយន្តដឹកអីវ៉ាន់មួយគ្រឿង ។
ធី សុវណ្ណថា មានឪពុកឈ្មោះ រុំ សុទ្ធី អាយុ៥០ឆ្នាំ និងម្តាយឈ្មោះ រ៉េត សុគុណ អាយុ ៤៨ឆ្នាំ ដែលអ្នកទាំងពីរជាអ្នកកំពង់ចាមដូចគ្នា។ សុវណ្ណថា មានបងប្អូន៤នាក់ ប្រុស៣នាក់ ស្រីតែរូបនាងម្នាក់ជាកូនច្បងគេ ហើយរូបនាង និងប្អូនប្រុសម្នាក់ទៀតកើតនៅសួង និងប្អូនប្រុសពីរនាក់ទៀតកើតនៅភ្នំពេញ។ សព្វថ្ងៃនាងរៀនថ្នាក់ទី១២ នៅសាលាឯកជន Cambodia Aventist។
សុវណ្ណថា បានបញ្ជាក់ថា៖«បងប្អូនសាច់ញាតិឪពុកម្តាយរបស់ខ្ញុំភាគច្រើនជាអ្នករកស៊ី ហើយគ្មានអ្នកណាម្នាក់ជាប់សែស្រឡាយជាអ្នកនយោបាយនោះទេ»។
ស្ងាត់ៗស្រាប់តែក្មេងស្រីស្រស់សោភាដែលកើតជានៅក្នុងគ្រួសារអ្នករកស៊ីធម្មតានាង ធី សុវណ្ណថា បានលេចមុខខ្ពស់ត្រដែតនៅក្នុងឆាកនយោបាយកាលពីឆ្នាំ២០១៣ ដែលនាំឲ្យមហាជនយល់ច្រឡំថា តារានយោបាយស្រីវ័យក្មេងរូបនេះជាកូនស្រីរបស់លោក កឹម សុខា អនុប្រធានគណបក្សសង្គ្រោះជាតិ នាង ធី សុវណ្ណថា បានឲ្យដឹងថា ដំបូងឡើយ នាងគ្រាន់តែជាអ្នកគាំទ្រផ្នែកនយោបាយម្នាក់ប៉ុណ្ណោះ ប៉ុន្តែក្រោយមកនាងបានសុំឪពុកម្តាយដើម្បីចូលខ្លួនក្នុងការប្រឆាំងតវ៉ាផ្សេងៗ រហូតនាងបានក្លាយជាយុវជនឆ្នើមម្នាក់របស់គណបក្សសង្គ្រោះជាតិ ហើយក៏ត្រូវបានគេស្គាល់ជាហូរហែ។
យុវតីវ័យ១៩ឆ្នាំ ដែលហ៊ានប្រឈមមុខរិះគន់មិនសំចៃមាត់ចំៗលើរដ្ឋាភិបាលរូបនេះនិយាយថា៖«ខ្ញុំចូលនយោបាយនេះ ព្រោះខ្ញុំមើលឃើញនូវភាពអយុត្តិធម៌ជាច្រើនបានកើតឡើងក្នុងសង្គមដូចជា វិបត្តិដីធ្លី អំពើពុករលួយគ្រប់រូបភាព ការនិយមបក្ខពួក បញ្ហាផ្នែកផ្លូវច្បាប់ ពិសេសនោះគឺលំហូរចូលនៃអន្តោប្រវេសន៍យួនជាដើម។ ខ្ញុំតែងគិតថា បើសិនគ្រប់គ្នានៅតែខ្លាចបន្តទៀត នោះសង្គមយើងនឹងទៅជាយ៉ាងណា? ដូច្នេះខ្ញុំសម្រេចចិត្តក្រោកឈរឡើង ដើម្បីជាស្មារតីឲ្យយុវជនយើងទាំងអស់ហ៊ានប្រឆាំងនឹងភាពអសកម្មក្នុងសង្គម»។ នាងបញ្ជាក់ថា៖«ខ្ញុំធ្លាប់ទទួលរងការគំរាមគ្រប់រូបភាពពីបក្សប្រជាជន និងជនមិនស្គាល់មុខ តែខ្ញុំត្រូវតែប្រឹងទៅមុខ ដើម្បីប្រទេសជាតិ»។
ក្រោយការចុះអង្កេតដល់ទីកន្លែងស្នាក់នៅរបស់ក្រុមសាច់ញាតិរបស់ ធី សុវណ្ណថា ជាលទ្ធផលបានឲ្យដឹងថា មិនមែនតែ ធី សុវណ្ណថា តែម្នាក់នោះទេ ដែលគាំទ្រចលនាបក្សសង្គ្រោះជាតិ ហើយហ៊ានចេញមុខប្រឆាំងនឹងការដឹកនាំរបស់រដ្ឋាភិបាលនោះ តាមពិតក្នុងចង្កោមសាច់ញាតិរបស់នាងភាគច្រើនបានចូលរួមក្នុងសកម្មភាពផ្សេងៗរបស់បក្សសង្គ្រោះជាតិ ហើយពួកគេក៏បានរួមចំណែកជាថវិកា និងរបស់របរផ្សេងៗជួយបក្សសង្គ្រោះជាតិដែរ។
សូម្បីតែលោកតាលោកយាយរបស់ ធី សុវណ្ណថា ដែលកំពុងរស់នៅផ្ទះទំនើបក្នុងបុរីប៉េង ហួត ក៏បានលើកទឹកចិត្តឲ្យ ធី សុវណ្ណថា ចេញមុខប្រឆាំងនឹងរដ្ឋាភិបាលដែរ ដើម្បីសង្គមមានការផ្លាស់ប្តូរ។
ស្ថិតក្នុងវ័យ ៤៨ឆ្នាំ អ្នកស្រី រ៉េត សុគុណ ដែលមមាញឹកនឹងរបររកស៊ីបោះដុំក្រណាត់ និងអំបោះ ត្រូវជាម្តាយបង្កើតរបស់ ធី សុវណ្ណថា បាននិយាយទាំងទឹកមុខមុតមាំថា អ្នកស្រីគ្រាន់តែជាអ្នកគាំទ្រម្នាក់ ហើយក៏បានចូលរួមការតវ៉ាប្រឆាំងនានាផងដែរ តែមានតែកូនស្រីរបស់អ្នកស្រីម្នាក់គត់បានចូលរួមជោគជាំក្នុងឆាកនយោបាយ។
អ្នកស្រី រ៉េត សុគុណ និយាយថា៖«ខ្ញុំមានតែកូនស្រីម្នាក់គត់ ពេលកូនស្រីធ្វើនយោបាយបែបនេះ ខ្ញុំក៏ព្រួយបារម្ភ ខ្លាចកូនស្រីមានគ្រោះថ្នាក់ដែរ ប៉ុន្តែកូនខ្ញុំបានព្យាយាមពន្យល់ខ្ញុំថា បើយើងមិនក្រោកឈរទេ ប្រទេសយើងគ្មានការរីកចម្រើនទេ»។
អ្នកស្រីពន្យល់ថា៖«វាប្រៀបបាននឹងក្របី ដែលតោប្រុងខាំត្របាក់អ៊ីចឹង បើក្របីនោះកំពុងត្រូវតោព្យាយាមខាំស៊ីហើយ បើក្របីមួយទៀតចូលជួយនោះ តោនឹងខ្លាចរត់មិនខាន»។
អ្នកស្រីបញ្ជាក់ថា៖«លោក សម រង្ស៊ី ជាវីរបុរសរបស់ខ្ញុំ គាត់តស៊ូ គាត់ត្រូវគេប៉ុនប៉ងជីវិតជាច្រើនលើក តែគាត់ប្រឹងដើម្បីជាតិ ហើយខ្ញុំចង់ឲ្យកូនស្រីខ្ញុំធ្វើដូចជាលោកស្រី មូរ សុខហួរ»។ អ្នកស្រីបញ្ជាក់បន្ថែមថា៖«ខ្ញុំលះបង់ទ្រព្យអស់ជាច្រើន ដើម្បីជាតិ ទោះបីក្នុងកាលៈទេសៈណាក៏ខ្ញុំមិនបោះបង់ការគាំទ្រនេះដែរ»។
ជាមួយគ្នានោះ លោក រុំ សុទ្ធី ដែលជាឪពុកបង្កើតរបស់ ធី សុវណ្ណថា បានឲ្យដឹងថា គ្រួសារលោកមួយពូជ បានគាំទ្រចលនាបក្សសង្គ្រោះជាតិ ហើយលោកបានលះបង់ទ្រព្យសម្បត្តិជាច្រើនម៉ឺនដុល្លារនៅក្នុងរយៈពេលប្រមាណជាង ១ឆ្នាំកន្លងមកនេះ។
លោកនិយាយថា៖«កូនស្រីខ្ញុំគេមានឆន្ទៈស្រាប់ ហើយខ្ញុំបានជួយគេពីក្រោយ ខ្ញុំបានទិញរថយន្តឡិចស៊ីស ៣៣០ ឲ្យគេជិះសម្រាប់ទៅរៀន និងធ្វើការងារនេះ ខ្ញុំបានផ្តល់ប្រាក់ឲ្យគេពេលចុះធ្វើសកម្មភាពផ្សេងៗ ហើយខ្ញុំបានជួយឧបត្ថម្ភនានាកន្លងមកទាំងការតវ៉ាប្រឆាំង ការទិញសម្ភារ ម្ហូបអាហារជាដើម អស់មិនតិចនោះទេ»។
លោក សុទ្ធី បញ្ជាក់ថា៖«ខ្ញុំមិនខ្លាចការគំរាមទេ កើតមកជីវិតមានតែមួយដូចគ្នា ខ្ញុំធ្វើអ្វីៗដើម្បីជាតិរបស់ខ្ញុំ ហើយខ្ញុំគិតថា នៅពេលនេះសន្ទុះប្រជាជនកាន់តែខ្លាំង គេនឹងក្រោកឈរការពារគ្នា»។
លោកបានបន្ថែមថា៖«ការផ្តល់លទ្ធភាពឲ្យកូនស្រីចូលរួមបក្សនយោបាយនេះ មិនមែនខ្ញុំសម្លឹងឃើញតំណែងតួនាទី ឬដើម្បីកិបកេងអ្វីនោះទេ ការចំណាយប្រាក់រាប់ម៉ឺនដុល្លាររបស់ខ្ញុំ គឺដើម្បីជាតិមានការផ្លាស់ប្តូរតែមួយមុខគត់»។
ទោះបីជាមួយពូជនៃគ្រួសារគាំទ្រពេញទំហឹងចំពោះគោលនយោបាយរបស់គណបក្សសង្គ្រោះជាតិ តែ ធី សុវណ្ណថា បញ្ជាក់ថា៖«សម្រាប់ខ្ញុំ និងគ្រួសារ មិនមែនគាំទ្រផ្កាប់មុខនោះទេ បើពួកគាត់ធ្វើការបម្រើជាតិបានល្អ យើងនឹងបន្តគាំទ្រ តែបើគាត់មានចំណុចអាក្រក់ យើងនឹងតវ៉ាភ្លាម»៕
June 4, 2014 6:20 AM នៅថ្ងៃនេះ នាង សុវណ្ណថា តារាដ៏ល្បីនៅក្នុងបណ្ដាញសង្គម Facebook ក៏បានចូលរួមក្នុងពិធីខួប ៦៥ ឆ្នាំ នៅវត្តសាមគ្គីរង្សី ដើម្បីរំឭកដល់ ថ្ងៃបារាំងកាត់ដែនដីកម្ពុជាក្រោមឲ្យវៀតណាម ផងដែរ ។ក្រៅពីការចូលរួមដោយផ្ទាល់ នាង ធី សុវណ្ណថា ក៏បានរចនា រូបថតរបស់ខ្លួន ក្នុងសម្លៀកបំពាក់ពណ៌ខៀវលឿងក្រហម និងដៃកាន់ទង់ជាតិខ្មែរក្រោម ដាក់នៅលើ Profile Facebook របស់ខ្លួនដើម្បីសម្ដែងនូវការសោកស្ដាយចំពោះការបាត់បង់ដែនដីកម្ពុជាក្រោម ទៀតផង ។ណ្ណថា បានបញ្ជាក់នៅលើ Facebook របស់ខ្លួនថ្ងៃនេះថា រដ្ឋាភិបាលខ្មែរអាចប្ដឹងទៅតុលាការអន្តរជាតិ ដើម្បី យក ដែន ដីកម្ពុជាក្រោម ជារបស់ខ្មែរមកវិញ ព្រោះមានភស្តិ៍គ្រប់គ្រាន់ ។ នាង ធីសុវណ្ណថា បញ្ជាក់ថា ៖ ទឹកដីខ្មែរកម្ពុជាក្រោម មិនទាន់បាត់បង់ទេ យើងនៅមានសិទ្ធ ប្តឹងទាស់ទៅតុលាការអន្តជាតិ យើងនៅមាន ភស្តុតាងជាច្រើន ដែលបញ្ញាក់ថា កម្ពុជាក្រោម ជាទឹកដីប្រទេសកម្ពុជា មានដូចជា ឯកសារប្រវត្តិសាស្ត្រ វត្តអារាម ប្រាសាទ ប្រជាជន ។ ឆ្នាំនេះ ក្រុមយុវជនខ្មែរក្រោម និង យុវជនខ្មែរនៅក្នុងប្រទេសកម្ពុជា បាននាំគ្នាផ្សព្វផ្សាយទង់ជាតិខ្មែរក្រោម យ៉ាងយ៉ាង ផុស ផុលនៅ លើបណ្ដាញសង្គម Facebook ភ្ជាប់ជាមួយនឹងព្រឹត្តិការណ៍ ខួប ៦៥ ឆ្នាំ ថ្ងៃ ៤ មិថុនា ដែលមិនធ្លាប់ មានតាំង មុនមក ។
សូមបញ្ជាក់ថា អង្គការសមាគមខ្មែរកម្ពុជាក្រោម និងពលរដ្ឋខ្មែរកម្ពុជាក្រោមជាង ១០០០ នាក់ នៅព្រឹកថ្ងៃពុធនេះ បាននាំ គ្នា ប្រារព្ធទិវាកាន់ទុក្ខខួបលើកទី ៦៥ ជាថ្ងៃដែលអាណានិគមបារាំង បានកាត់ទឹកដីខ្មែរចំនួន ២១ ខេត្ត-ក្រុង ទៅឲ្យប្រទេស វៀតណាមត្រួតត្រាមកដល់សព្វថ្ងៃនេះ ។
ពិធីរំឭកខួបបាត់បង់ទឹកដីកម្ពុជាក្រោម ថ្ងៃទី ៤ មិថុនា ធ្វើឡើងនៅវត្តសាមគ្គីរង្សី រាជធានីភ្នំពេញ ដោយមានការរាប់ បាតប្រ គេនព្រះសង្ឃ ដើម្បីឧទិសកុសលដល់ព្រះវិញ្ញាណខណ្ឌ ព្រះមហាវិរក្សត្រ ព្រះវិរសាមណៈ និងវិរបុរសខ្មែរទាំងអស់ដែល បានពលី ជីវិតក្នុងបុព្វហេតុជាតិ ពិសេសទឹកដីខ្មែរកម្ពុជាក្រោម និងជាការផ្ញើរសារមួយដល់រដ្ឋាភិបាលបារាំងដែល បានកាត់ ទឹកដីខ្មែរ ទៅឲ្យវៀតណាមត្រួតត្រានោះ ។
ពិធីនេះ ធ្វើឡើងក្រោមអធិបតីភាព សម្តេច ស៊ីសុវត្ថិ ពង្សនារី ដែលជាព្រះរាជតំណាងដ៏ខ្ពង់ខ្ពស់ របស់ព្រះករុណា ព្រះបាទ សម្តេច ព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា និងមានការចូលរួមពីសំណាក់ ព្រះសង្ឃ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ យុវជន អង្គការសមាគមខ្មែរកម្ពុជា ប្រជាពលរដ្ឋខ្មែរកម្ពុជា ក្រោម និងពលរដ្ឋដែលមានជម្លោះដីធ្លីនៅខេត្តក្រចេះ សរុបប្រមាណជាង ១០០០ នាក់ ។
នៅម៉ោងជាង ៧ ព្រឹកនេះដែរ ព្រះសង្ឃ និង យុវជន ប្រមាណ ២០០ អង្គ/នាក់ ពាក់អាវយឺតដែលមានទង់ ជាតិខ្មែរក្រោម និងដៃកាន់ ទង់ជាតិខ្មែរក្រោម និងទង់ជាតិនៃប្រទេសកម្ពុជា ក៏បានដង្ហែពីភូមិទ្រា សង្កាត់ស្ទឹងមាន ជ័យ ទៅកាន់ វត្តសាមគ្គីរង្សី ដើម្បីចូលរួមប្រារព្ធពិធីនៅទីនោះដែរ ។
យ៉ាងណាក៏ដោយ កាលពីថ្ងៃទី ០២ ខែមិថុនា អាជ្ញាធររាជធានីភ្នំពេញ មិនអនុញ្ញាតឲ្យអង្គការសមាគមខ្មែរកម្ពុជាក្រោម រៀបចំវេទិកាសាធារណៈឡើយ ដោយអនុញ្ញាតឲ្យធ្វើពិធីជួបជុំ និងរាប់បាត្រតាមបែបព្រះពុទ្ធសាសនាតែ ប៉ុណ្ណោះ ។
ថ្ងៃទី ០៤ ខែមិថុនា ឆ្នាំ ១៩៤៩ ជាថ្ងៃដែលអាណានិគមនិយមបារាំង បានអនុម័តច្បាប់មួយ ដោយសំរេចកាត់ទឹកដីខ្មែរ កម្ពុជា ក្រោម ចំនួន ២១ ខេត្តក្រុង ទៅឲ្យអាជ្ញាធរ អាណានិគមនិយមវៀតណាមត្រួតត្រា ដោយមិនបានសួរមតិប្រជា ពលរដ្ឋ ខ្មែរ ជាម្ចាស់ស្រុក ឬថ្នាក់ដឹកនាំនៃព្រះរាជាណាចក្រកម្ពុជាឡើយ ៕
នាង ធី សុវណ្ណថា តារាល្បឺក្នុង Facebook និងជាសម្មជនឆ្នើុមរបស់គណបក្សសង្រ្គោះជាតិធ្លាក់បាក់ឌុបលើទីពីរ ធនធានយុវជនដ៏លេចធ្លោក្នុងការចូលរួមយុទ្ទនាការណ័ឃោសនាបោះឆ្នោត 2013 និងជាអ្នកស្រែកបណ្តេញនាយករដ្ឋមន្រី ហុន សែន អោយចុះពីដំណែង របស់គណបក្សសង្រ្គោះជាតិមិនអាចប្រលងជាប់បាក់ឌុបជាលើកទីពីរ “ថ្ងៃស្អែក ចេញលទ្ធផលបាក់ឌុប។ ប្រសិន ខ្ញុំជាប់និទ្ទេសA ត្រូវទទួលរង្វាន់ពី លោក ហ៊ុន សែន។ តើខ្ញុំត្រូវធ្វើយ៉ាងណា? នេះជាសំនួរដ៏ក្លាហានរបស់កញ្ញាមុនពេលចេញលទ្ធផលមួយថ្ងៃ។ កញ្ញា ធី សុវណ្ណថា ដែលចាប់ផ្តើមភាពល្បីល្បាញ់របស់ខ្លួនដោយសារតែការរិះគន់ខ្លាំងៗ ដល់លោកនាយករដ្ឋមន្រ្តី ហ៊ុន សែន កាលពីការឃោសនាបោះឆ្នោតកន្លងទៅបាន សរសេរបង្ហោះលើ Facebook Page របស់ខ្លួនកាលពីល្ងាច ថ្ងៃទី 12 ខែ កញ្ញា ឆ្នាំ2015 ថា “ស្ទើរមិនគួរឲ្យជឿ លទ្ធផលបាក់ឌុបរបស់ខ្ញុំគឺ “ធ្លាក់” ខ្ញុំមិនប្រឆាំងតវ៉ា និងមិនធ្វើបាតុកម្ម ប្រឆាំងលទ្ធផលប្រឡងនេះទេ តែខ្ញុំនឹងស្នើសុំក្រសួងអប់រំ ដើម្បីពិនិត្យកំណែវិញ្ញាសាររបស់ខ្ញុំ”។តើក្រសួងអប់រំ និងអនុគ្រោះពិនិត្យសារឡើងវិញទៅលើវិញ្ញាសាររបស់នាងដែលជាអនាគត់តំណាងរាស្រ្ត គណបក្សសង្គ្រោះជាតិដែរទេ? គួររំលឹកដែរថាក្រោយពេលប្រលង នាងធ្លាប់បាននិយាយថាមានការរំខានក្នុងពេលដែលនាងប្រលង។ ក្រោយមក មុនពេលប្រកាសលទ្ធផលផ្លូវការ វីរៈនារី ក្នុងដូងចិត្តយុវជនសង្គ្រោះជាតិម្នាក់នេះបានសរសេរលើទំព័រ Facebook របស់ខ្លួនថា៖ ថ្ងៃស្អែក ចេញលទ្ធផលបាក់ឌុបប្រសិន ខ្ញុំជាប់និទ្ទេសA ត្រូវទទួលរង្វាន់ពី លោក ហ៊ុន សែន។ តើខ្ញុំត្រូវធ្វើយ៉ាងណា? តែជាគួរអោយស្តាយធនធានមនុស្សដ៏កំររកបានរបស់ គបក្សប្រឆាំង តាមរយៈលទ្ធផលផ្លូវការណ៍របស់ក្រសួងអប់រំ នៅល្ងាចនេះ មិនអាចមានមុខទៅជួបនាយរដ្ឋមន្រ្តីដែលនាងធ្លាប់រិះគន់យ៉ាងចាស់ដៃឡើយ៕
29/06/2015 អ្នកការពារធម្មជាតិ៖ តំបន់អារ៉ែង មិនគួរជាកន្លែងកេងចំណេញនយោបាយ បន្ទាប់ពីមានសកម្មភាពអភិវឌ្ឍន៍តំបន់អារ៉ែង ជាបន្តបន្ទាប់ ពីសំណាក់ក្រុមយុវជនគាំទ្របក្សប្រឆាំង និងបក្សកាន់អំណាច ស្ថាបនិកការពារព្រៃឈើនៅតំបន់អារ៉ែង បានសម្តែងការព្រួយបារម្ភយ៉ាងខ្លាំង។ ព្រួយបារម្ភ ព្រោះគេយល់ថា ការជួយអភិវឌ្ឍន៍នេះ ជាសកម្មភាពទាញប្រយោជន៍នយោបាយ សេដ្ឋកិច្ច ជាជាងប្រយោជន៍សហគមន៍ និងព្រៃឈើក្នុងតំបន់។ អ្នកការពារធម្មជាតិតំបន់អារ៉ែង បានថ្លែងប្រាប់វិទ្យុបារាំងថា ពួកគេកំពុងមានការព្រួយបារម្ភកាន់តែខ្លាំង ចំពោះសកម្មភាពអភិវឌ្ឍន៍ជាបន្តបន្ទាប់ ទៅលើតំបន់អារ៉ែង របស់ក្រុមយុវជន ដែលមាននិន្នាការគាំទ្រគណបក្សសង្គ្រោះជាតិ និងគណបក្សប្រជាជនកម្ពុជា។ ជាការព្រួយបារម្ភ ដែលកើតចេញមក ដោយសំអាងថា អ្នកមកអភិវឌ្ឍន៍តំបន់នេះ បានឆ្លៀតកេងចំណេញយកប្រយោជន៍នយោបាយ សេដ្ឋកិច្ច សម្រាប់តែខ្លួនឯង មិនមែនសម្រាប់ប្រជាសហគមន៍ នៅក្នុងតំបន់នោះឡើយ។ លោក ម៊ូត គឹមរី សហស្ថាបនិកចលនាមាតាធម្មជាតិ បានប្រាប់វិទ្យុបារាំងនៅថ្ងៃនេះថា កាលពីចុងសប្តាហ៍នេះ តំបន់អារ៉ែង ទើបទទួលបានវត្តមានរបស់ក្រុមយុវជន ១៥៧នាក់ ដែលដឹកនាំដោយលោកហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រីហ៊ុន សែន។ លោកគឹមរី បានសាទរចំពោះការចុះទៅចែកអំណោយ និងផ្តល់ជំនួយជាគោយន្ត ២គ្រឿងដល់ឃុំចំនួនមួយ នៅក្នុងតំបន់នេះ ប៉ុន្តែអ្នកការពារព្រៃឈើរូបនេះ បានសម្តែងការព្រួយបារម្ភច្រើន ជាងការសប្បាយចិត្ត។
លោកម៊ូត គឹមរី បានបង្ហាញទស្សនៈថា ការទៅដល់របស់ក្រុមយុវជន ១៥៧នេះ គឺដើម្បីគ្រាន់តែទាញប្រជាប្រិយភាពផ្នែកនយោបាយ ឬជាការមើលភូមិសាស្ត្រ ដាក់បន្ទាយទ័ព។ ហើយលោកថែមទាំងបារម្ភថា អាចនឹងមានការសាងសង់ទំនប់វារីអគ្គិសនី នៅតំបន់អារ៉ែងជាថ្មី បើទោះបីជាលោកនាយករដ្ឋមន្ត្រីហ៊ុន សែន បានប្រកាសបញ្ឃប់សកម្មភាពវារីអគ្គិសនីនោះក៏ដោយ។ លោកគឹមរី មើលឃើញថា ការទៅដល់នេះ ក៏ហាក់ដូចជាការប្រើឥទ្ធិពលមួយទៅលើប្រជាពលរដ្ឋនៅទីនោះ ដោយសារគេសង្កេតឃើញមានការហែហមដោយកម្លាំងប៉ូលីស ទាហាន និងកម្លាំងយោធា ជាច្រើននាក់ បូករួមទាំងសម្ភារៈយោធាទៀតផង។
ក្រៅពីនេះ សហស្ថាបនិកចលនាមាតាធម្មជាតិរូបនេះយល់ឃើញថា ការអភិវឌ្ឍន៍ រួមមានការសាងសង់បន្ទប់ទឹក របស់កញ្ញាធី សុវណ្ណថា យុវជនគាំទ្រគណបក្សសង្គ្រោះជាតិ គឺជារឿងល្អតែមួយជ្រុងប៉ុណ្ណោះ។ ប៉ុន្តែចំពោះការនាំភ្ញៀវចូលតំបន់អារ៉ែង របស់កញ្ញាម្នាក់នេះ មិនបាននាំចំណូលមកដល់អ្នកភូមិតំបន់អារ៉ែងនោះទេ ហើយផ្ទុយទៅវិញកញ្ញាធី សុវណ្ណថា មិនបានសហការជាមួយកម្មវិធីដំណើរកម្សាន្តអេកូទេសចរណ៍ទៀតផង។ លោកគឹមរី អះអាងថា សកម្មភាពរបស់កញ្ញាធី សុវណ្ណថា មានការអភិវឌ្ឍផង និងធ្វើឲ្យប៉ះពាល់ដល់បរិស្ថាន បាត់បង់វប្បធម៌ ប្រពៃណីរបស់ជនជាតិដើមភាគតិច នៅក្នុងតំបន់អារ៉ែងផងដែរ។
ជាសំណូមពរ អ្នកការពារធម្មជាតិតំបន់អារ៉ែង ចង់ឲ្យមានការអភិរក្សតំបន់អារ៉ែង ដូចជាការធ្វើផ្លូវថ្នល់ សាលារៀន ជាបន្តទៀត ក្នុងលក្ខខណ្ឌរក្សាប្រពៃណី វប្បធម៌ ជនជាតិដើមភាគតិចដដែល។ និងសំណូមពរ កុំឲ្យមានការប្រើប្រាស់តំបន់អារ៉ែង សម្រាប់រូបភាពផ្សេងៗ ដូចជាការផ្តល់ដីសម្បទាន ការដាក់លានដ្ឋាន បន្ទាយទ័ព នៅតំបន់នេះជាដើម៕
ថ្ងៃទី២៦ ខែធ្នូ ឆ្នាំ២០១៦ ធី សុវណ្ណថា ចេញមុខបដិសេធព័ត៌មានថា កញ្ញា និងក្រុមលោក ស្រី ចំរើន និងក្រុម ផែ សុវណ្ណរិទ្ធ បែកបាក់គ្នា ! (ភ្នំពេញ)៖ ថ្លែងប្រាប់អង្គភាពព័ត៌មាន Fresh News នៅព្រឹកថ្ងៃទី២៦ ខែធ្នូ ឆ្នាំ២០១៦នេះ កញ្ញា ធី សុវណ្ណថា ដែលគេដឹងថា ជាតារា Facebook មួយរូបនៅកម្ពុជាបានឲ្យដឹងថា នាងសូមបដិសេធចំពោះព័ត៌មាននានានៅលើបណ្តាញសង្គម ក៏ដូចជានៅលើសារព័ត៌មានមួយចំនួនថា រូបនាង និងក្រុមការងារលោក ស្រី ចំរើន ព្រមទាំងក្រុមការងារ ផែ សុវណ្ណរិទ្ធ បែកបាក់ និងមានទំនាស់ជាមួយគ្នា !
កញ្ញា ធី សុវណ្ណថា បានថ្លែងយ៉ាងដូច្នេះថា «ខ្ញុំសូមបដិសេធទាំងស្រុងចំពោះព័ត៌មានថា ពួកខ្ញុំមានក្រុមលោក ស្រី ចំរើន និងក្រុមលោក ផែ សុវណ្ណរិទ្ធ, ពួកខ្ញុំទាំងអស់គ្នាមិនមានទំនាស់ជាមួយគ្នាអីនោះទេ អ្វីដែលឃើញនៅបណ្តាញសង្គមមួយចំនួន និងកាសែត Cambodia Daily គឺជារឿងមិនពិត។ ខាងក្រោមនេះជារូបភាពជាក់ស្តែងដែល ពួកយើងខ្ញុំធ្វើការជុំគ្នា និងទៅណាមកណាជុំគ្នា មិនមានការបែកបាក់គ្នាដូចចុះផ្សាយនោះទេ»៕
០៣ ឧសភា ២០១៦ លាការកោះហៅលោក កឹម សុខា ពាក់ព័ន្ធនឹងបណ្ដឹង ធី សុវណ្ណថា ព្រះរាជអាជ្ញារងនៃសាលាដំបូងរាជធានីភ្នំពេញចេញដីកាកោះហៅប្រធានស្ដីទីគណបក្សសង្គ្រោះជាតិលោក កឹម សុខា ឲ្យចូលខ្លួនទៅតុលាការនៅសប្ដាហ៍ក្រោយ ដើម្បីសាកសួរពីដំណើររឿងដែលកញ្ញា ធី សុវណ្ណថា បានប្ដឹងរូបលោកពីបទបរិហារកេរ្តិ៍។
ក្នុងដីកាចុះថ្ងៃទី៣ ខែឧសភានេះ ព្រះរាជអាជ្ញារងនៃសាលាដំបូងរាជធានីភ្នំពេញលោក កែវ សុជាតិ កោះហៅលោក កឹម សុខា ឲ្យចូលទៅកាន់សាលាដំបូងរាជធានីនៅថ្ងៃទី១១ ខែឧសភា ម៉ោង៩ព្រឹក “ដើម្បីសាកសួរអំពីដំណើររឿងដែលឈ្មោះ ធី សុវណ្ណថា ប្ដឹងពីអំពើបរិហារកេរ្តិ៍ តាមរយៈខ្សែអាត់សំឡេងផ្សព្វផ្សាយក្នុងសារព័ត៌មាន Freshnews កាលពីថ្ងៃទី១ ខែមីនា ឆ្នាំ២០១៦ និងតាមហ្វេសប៊ុកឈ្មោះ រឿងពិត CNRP”។
វីអូឌីមិនទាន់អាចសុំការយល់ឃើញពីលោក កឹម សុខា ភ្លាមៗបាននៅឡើយទេករណីនេះ។
គួរបញ្ជាក់ថា ព្រះរាជអាជ្ញារងនៃសាលាដំបូងរាជធានីភ្នំពេញចេញដីកាកោះហៅតំណាងរាស្ត្រ២រូបរបស់គណបក្សសង្គ្រោះជាតិឲ្យចូលទៅបំភ្លឺផងដែរ ពីការចោទប្រកាន់ពីអំពើពេស្យាចារ ដែលទំនងសំដៅលើករណីនៃការចោទប្រកាន់រឿងអាស្រូវស្នេហារបស់អនុប្រធានគណបក្សប្រឆាំងលោក កឹម សុខា។ តំណាងរាស្ត្រទាំងពីររូបដែលត្រូវបានតុលាការកោះហៅមានលោក តុ វ៉ាន់ចាន់ តំណាងរាស្រ្តខេត្តកណ្តាល និងលោក ពិន រតនា តំណាងរាស្រ្តខេត្តបាត់ដំបងមកពីគណបក្សសង្គ្រោះជាតិ។
ទោះយ៉ាងណា លោក តុ វ៉ាន់ចាន់ ដែលជាតំណាងរាស្ត្រ និងមានអភ័យឯកសិទ្ធិនោះ បានប្រាប់វីអូឌីតាមទូរស័ព្ទនៅរសៀលថ្ងៃអង្គារនេះថា លោកនឹងមិនចូលបំភ្លឺទៅតាមដីកាកោះនេះនោះទេ។ លោកចាត់ទុកដីកាកោះហៅរូបលោកសាកសួរដំណើររឿងពាក់ព័ន្ធនឹងអំពើពេស្យាចារនេះថាគ្រាន់តែជាការរៀបចំឡើងរបស់បុគ្គលណាម្នាក់ប៉ុណ្ណោះ។ លោកបន្ថែមថា៖ “ខ្ញុំមិនខ្វល់ទេរឿងអស់ហ្នឹងនោះ ខ្ញុំមិនចូលទេ…វាជាសិទ្ធិរបស់តុលាការគេចង់សួរនាំ ប៉ុន្តែសម្រាប់ខ្ញុំវាជាខ្ញុំជាសិទ្ធិរបស់ខ្ញុំដែរណា…គេធ្វើអីធ្វើទៅបងអ្ហើយរឿងគេអ្នកបង្កើត យើងទៅទប់ក៏ទប់គេមិនបានដែរ”។
កាលពីខែមីនា កញ្ញា ធី សុវណ្ណថា បានដាក់ពាក្យប្តឹងឲ្យសមត្ថកិច្ចស្រាវជ្រាវពីសំឡេងសន្ទនាស្នេហាដែលត្រូវគេអះអាងថាជាការសន្ទនារវាងលោក កឹម សុខា និងកញ្ញា ខុម ចាន់តារាទី ហៅស្រីមុំ ដោយថាចំណែកមួយនៃការសន្ទនាមានលក្ខណៈបរិហាកេរ្តិ៍ឈ្មោះនាង។
ពាក់ព័ន្ធនឹងករណីនេះដែរ កាលពីសប្ដាហ៍មុន កញ្ញា ធី សុវណ្ណថា និងកញ្ញាស្រីមុំ បានចូលខ្លួនទៅបំភ្លឺតាមការកោះហៅរបស់តុលាការផងដែរ៕
ការចេញមកបដិសេធរបស់កញ្ញា ធី សុវណ្ណថា នៅពេលនេះធ្វើឡើង បន្ទាប់ពីមានបណ្តាញសង្គម Facebook មួយចំនួនបានសរសេរពាក្យថា «ខ្ញុំ ធី សុវណ្ណថា សូមប្រកាសឈប់ទាក់ទងជាមួយក្រុម ស្រី ចំរើន និងក្រុម ផែ សុវណ្ណរិទ្ធ។ ហើយខ្ញុំបាននិងកំពុងរៀបចំពាក្យបណ្តឹង និងសហការជាមួយសមត្ថកិច្ច ដើម្បីចាប់ខ្លួនបុគ្គលទាំងនោះពីបទប្រមាទនិងទំលាយឯកសារឯកជន»។
កញ្ញា បានបញ្ជាក់ឲ្យដឹងបន្ថែមទៀតថា ជាក់ស្តែងកាលពីម្សិលមិញលោក ស្រី ចំរើន បានអញ្ជើញតំណាងរូបនាង ក្នុងនាមប្រធានអង្គការ «យុវជន និងកិច្ចការសង្គម» នៅក្នុងវេទិកាសាធារណៈទី៤៧ ស្តីពីការចូលរួមរបស់ពលរដ្ឋ នៅក្នុងការអភិវឌ្ឍភូមិ-ឃុំ ស្ថិតនៅភូមិកណ្តាល ឃុំខ្ពបអាទាវ ស្រុកលើកដែក ខេត្តកណ្តាល ដោយមានបងប្អូនប្រជាពលរដ្ឋចូលរួមប្រមាណ៤០០នាក់៕
09:27 AM 27.02.2016 ធី សុវណ្ណថា ខ្ញុំនឹងលក់ដីចំការម្រេចគ្រួសារ១កន្លែង និងផ្តល់ប្រាក់២០ម៉ឺនដុល្លារបើទូរទស្សន៍សង្គ្រោះជាតិ (ភ្នំពេញ)៖ នៅព្រឹកថ្ងៃនេះ កញ្ញា ធី សុវណ្ណថា បានឌឺដងទៅដល់ថ្នាក់ដឹកនាំគណបក្សសង្គ្រោះជាតិ ពាក់ព័ន្ធនឹងការដំណើរការទូរទស្សន៍ព្រះអាទិត្យ ដោយកញ្ញា បានលើកឡើងថា កញ្ញានឹងឧបត្ថម្ភមូលនិធី២០ម៉ឺនដុល្លារ ដើម្បីជួយផលិតព័ត៌មានទូរទស្សន៍សង្គ្រោះជាតិ ប្រសិនបើទូរទស្សន៍ព្រះអាទិត្យដំណើរការ។
ធី សុវណ្ណថា ជាតារា Facebook ដ៏ល្បីមួយរូបបានចេញមុខមកប្រកាស នឹងស្នើសុំសិទ្ធិ គ្រប់គ្រងទូរទស្សន៍សង្គ្រោះជាតិ (ទូរទស្សន៍ព្រះអាទិត្យ) ហើយកញ្ញាសន្យាថា នឹងធ្វើឲ្យទូរទស្សន៍សង្គ្រោះជាតិ ដំណើរការឆាប់ៗ។ ឥឡូវនៅពេលនេះ កញ្ញា បានលើកឡើងនៅលើ Facebook របស់កញ្ញាដោយឌឺដងទៅដល់ថ្នាក់ដឹកនាំគណបក្ស ដោយមានន័យយ៉ាងដូច្នេះថា «បើទូរទស្សន៍ សង្គ្រោះជាតិមានដំណើរការ ខ្ញុំនឹងលក់ដីចំការម្រេច គ្រួសារ ១កន្លែង ដើម្បីបានប្រាក់ផ្តល់មូលនិធិ ២០ម៉ឺនដុល្លារ ជួយផលិតព័ត៌មាន ទូរទស្សន៍សង្គ្រោះជាតិ»។
សូមជំរាបថា នៅថ្ងៃទី២៦ ខែកុម្ភៈ ឆ្នាំ២០១៦នេះម្សិលមិញ ក្រុមតំណាងយុវជនហ្វេសប៊ុករបស់គណបក្សសង្គ្រោះជាតិ បានចេញញតិ្តគាំទ្រ កញ្ញា ធី សុវណ្ណថា ក្នុងការដឹកនាំ និងគ្រប់គ្រងទូរទស្សន៍ព្រះអាទិត្យ តាមការស្នើសុំរបស់កញ្ញា ក្នុងការគ្រប់គ្រងទូរទស្សន៍ព្រះអាទិត្យ។ នៅក្នុងលិខិតនោះ បានបញ្ជាក់ថា៖ ដោយបានឃើញពីឆន្ទៈមោះមុតរបស់ កញ្ញា ធី សុវណ្ណថា តាមរយៈការបង្ហោះសារក្នុង គណនីហ្វេសប៊ុក ដែលបានសង្កត់ធ្ងន់ថា កញ្ញានឹងគ្រប់គ្រងទូរទស្សន៍សង្គ្រោះជាតិ ដើម្បីលើកស្ទួយកិត្តិយសគណបក្សសង្គ្រោះជាតិឡើងវិញ ក្នុងរយៈពេល៦ខែ។ ក្នុងនាមយុវជនហ្វេសប៊ុក និងជាអ្នកគាំទ្រគណបក្សសង្គ្រោះជាតិ សូមគាំទ្រកញ្ញា ធី សុវណ្ណថា ឲ្យគ្រប់គ្រងទូរទស្សន៍ព្រះអាទិត្យ ដោយហេតុថា កញ្ញា ធី សុវណ្ណថា ជាយុវជនតែម្នាក់គត់ដែលស័ក្តិសម និងមានគុណសម្បតិ្តគ្រប់គ្រាន់ធ្វើជានាយិកាទូរទស្សន៍ព្រះអាទិត្យ៕
July 9, 2016 ភាពលេចធ្លោនិងបដិវត្តន៍នៃ’នារីសង្គ្រោះ’ ធី សុវណ្ណថា ក្នុងរយៈពេល៦ខែបន្ទាប់ពីការបោះឆ្នោតជាតិនាខែកក្កដា ឆ្នាំ២០១៣ សកម្មជនសង្គ្រោះជាតិវ័យជំទង់ ធី សុវណ្ណថា គឺប្រហែលជាតួអង្គនយោបាយដែលមិនជ្រើសតាំងនិងមានប្រជាប្រិយបំផុតនៅក្នុងប្រទេសកម្ពុជា ដោយក្លាយជាមុខមាត់របស់រូបសណ្ឋាននៃនយោបាយហ្វេសប៊ុកក្នុងប្រទេសនេះ។
រូបភាពនិងវីដេអូនៃសិស្សវិទ្យាល័យវ័យ១៨ឆ្នាំដ៏ទាក់ទាញនេះត្រូវបានបង្ហោះដោយគណបក្សប្រឆាំងទៅលើបណ្តាញសង្គមក្នុងអំឡុងពេលឃោសនាបោះឆ្នោតដែលបង្ហាញភាពប៉ិនប្រសប់អំពីផលប្រយោជន៍នៃការចូលរួមយុទ្ធនាការរបស់គណបក្សសង្គ្រោះជាតិ ឆ្នាំ២០១៣ដោយអ្នកចាត់ចែងយុទ្ធនាការប្រចាំក្រុងភ្នំពេញរបស់បក្សសង្គ្រោះជាតិគឺ លោក លី សុវិជ្ជា ដែលនៅជិតរូបថតរបស់កញ្ញា សុវណ្ណថាដែលប្រមូលផ្តុំទង់ជាតិគណបក្សសង្គ្រោះជាតិតូចៗថា “គេដឹងថា នារីសង្គ្រោះជាតិវ័យក្មេងគឺស្អាត ហើយទន់ភ្លន់ នៅពេលដែលលោកអ្នកជួបពួកគេ”។
ក្នុងរយៈពេលប៉ុន្មានខែនៃបាតុកម្ម បន្ទាប់ពីការបោះឆ្នោតដ៏ចម្រូងចម្រាស កញ្ញា សុវណ្ណថាបានជួយដឹកនាំ ដោយអង្គុយលើដំបូលរថយន្ត ឡិចស៊ីស ស៊ូវរបស់នាង ពោលគឺស្រែកពាក្យរបស់គណបក្សប្រឆាំងថា “ហ៊ុន សែន អើយ ចុះចេញទៅ” ទន្ទឹមនឹងនោះក៏ប្រើទូរស័ព្ទស្មាតហ្វូនរបស់នាងថតព័ត៌មានសម្រាប់ទំព័រហ្វេសប៊ុក “I Love Cambodia Hot News II” ដែរ។
វីដេអូឃ្លីបបានជួយបំបែកភាពរឹតត្បិតដ៏តឹងរ៉ឹងរបស់គណបក្សប្រជាជនកម្ពុជាទៅលើបណ្តាញសារព័ត៌មាន ហើយក៏ជួយជំរុញគណបក្សសង្គ្រោះជាតិជិតនឹងទទួលបានជ័យជម្នះ ហើយប្រជាប្រិយភាពនិងភាពក្លាហានរបស់នាងបានធ្វើឲ្យនាងចូលកៀកនឹងមេដឹកនាំគណបក្សប្រឆាំងគឺលោក សម រង្ស៊ី និងលោក កឹម សុខាតនៅឯការតវ៉ាដែលបានកើតឡើងនោះ។
កញ្ញា សុវណ្ណថា បានស្រែកទៅកាន់ក្រុមអ្នកតវ៉ាក្នុងខែធ្នូ ឆ្នាំ២០១៣ថា “ហ៊ុន សែន អន់អើយអន់ជាងស្រីទៀត។ បបួលបោះឆ្នោតឡើងវិញ អត់ហ៊ាន។ គាត់ចេញតាមទូរទស្សន៍ហើយសួរ ‘តើខ្ញុំធ្វើអីខុស?’ ពូមីង សួរតាមត្រង់ អ្នកណាធ្វើឲ្យពូមីងឈឺចាប់?”
ហ្វូងមនុស្សបានឆ្លើយថា “ហ៊ុន សែន” ទន្ទឹមនោះកញ្ញា សុវណ្ណថាក៏ថតខ្លួនឯងសម្រាប់វីដេអូមួយទៀតដែរ។
បន្ទាប់មក មួយខែក្រោយពីរដ្ឋាភិបាលក្នុងខែមករា ឆ្នាំ២០១៤បានបង្ក្រាបហិង្សាលើការតវ៉ារបស់គណបក្សសង្គ្រោះជាតិទូទាំងក្រុងភ្នំពេញនោះ កឹម មនោវិទ្យា កូនស្រីច្បងរបស់លោក សុខា បានចេញសេចក្តីថ្លែងការណ៍មួយបណ្តេញកញ្ញា សុវណ្ណថា ចេញពីបក្ស។
សេចក្តីថ្លែងការណ៍ចេញនៅថ្ងៃទី១ ខែកុម្ភៈសរសេរថា “គណបក្សសង្គ្រោះជាតិសូមបញ្ជាក់ថា កញ្ញា ធី សុវណ្ណថា មិនជាប់ពាក់ព័ន្ធនឹងគណបក្សសង្គ្រោះជាតិទេ”។
លោក អេង ពន្លក ប្អូនប្រុសរបស់លោក អេង ឆៃអ៊ាង តំណាងរាស្ត្រជាន់ខ្ពស់គណបក្សសង្គ្រោះជាតិ និងជាស្ថាបនិកទំព័រ “I Love Cambodia Hot News II” បាននិយាយប៉ុន្មានថ្ងៃក្រោយមកថា “ខ្ញុំព្រួយបារម្ភ។ ខ្ញុំសង្ស័យថា នាងជាគិញរបស់គណបក្សប្រជាជនកម្ពុជា”។
លោក ពន្លក បានពន្យល់ថា មានភ័ស្តុតាងដែលថា កញ្ញា សុវណ្ណថាជាចារនារីគណបក្សប្រជាជនកម្ពុជា ហើយក៏ជាដៃគូជាសម្ងាត់របស់សកម្មជនគណបក្សប្រជាជនកម្ពុជាលោក ផែ សុវណ្ណារិទ្ធ ដែលក្នុងអំឡុងពេលឃោសនាបោះឆ្នោតបានធ្វើជាគូបដិបក្សសំខាន់របស់នាងនៅលើហ្វេសប៊ុក ហើយក៏ការពារគណបក្សប្រជាជនយ៉ាងប្តូរផ្តាច់ដែរ។
លោក ពន្លក បាននិយាយថា “ខ្ញុំមិនដឹងទេក្នុងពេលអនាគតថា [គណបក្សប្រជាជនកម្ពុជា]នឹងធ្វើយ៉ាងម៉េចចំពោះប្រជាប្រិយភាពរបស់ សុវណ្ណថា ប៉ុន្តែ…មានសមាជិកគណបក្សសង្គ្រោះជាតិមួយចំនួនគឺព្រួយបារម្ភ”។ លោកបានពន្យល់ថា លោកព្រួយបារម្ភអំពីការនិយាយរិះគន់តាមអ៊ិនធើណិតរវាងកញ្ញា សុវណ្ណថា និងលោក សុវណ្ណារិទ្ធ។
សម្រាប់មនុស្សជាច្រើន ការបណ្តេញចេញជាសាធារណៈទៅលើសិស្សវិទ្យាល័យមានប្រជាប្រិយភាពនៃគណបក្សសង្គ្រោះជាតិ គឺដូចជាការលេងសើច ហើយចំណាប់អារម្មណ៍មិនមានប្រយោជន៍ចំពោះការឆ្លើយតបរបៀបចាស់ទុំរបស់នាងទេ ដោយទទួលយកការបណ្តេញចេញទាំងមិនត្អូញត្អែរ ហើយក៏និយាយថា នាងនៅតែគាំទ្រគណបក្សសង្គ្រោះជាតិ។
កញ្ញា សុវណ្ណថា បាននិយាយកាលពីខែតុលា ឆ្នាំ២០១៤ បន្ទាប់ពីការវាយប្រហារជាសាធារណៈកាន់តែច្រើនទៅលើផែនការដែលគេចោទថា ប្រឆាំងគណបក្សសង្គ្រោះជាតិថា “ខ្ញុំគិតថា កញ្ញា មនោវិទ្យា មិនគួរបារម្ភទេ”។
កញ្ញាបាននិយាយថា “អ្វីដែលគាត់និយាយគឺគ្មានភ័ស្តុតាងទេ។ វាមិនល្អសម្រាប់គណបក្សសង្គ្រោះជាតិ ឬសម្រាប់គាត់ទេ”។
វិធានការបែបនេះក៏មានឥទ្ធិពលតិចតួចក្នុងការកាត់បន្ថយប្រជាប្រិយភាពរបស់នាង ហើយនាងបន្តផលិតវីដេអូសម្រាប់អ្នកតាមដានទំព័រហ្វេសប៊ុកជិតកន្លះលាននាក់របស់នាង សូម្បីតែបើកបរទៅកាន់ក្រុងសៀមរាបក្នុងខែវិច្ឆិកា ដើម្បីគាំទ្រលោក រង្ស៊ី បន្ទាប់ពីលោកបាននិយាយថា លោកនឹងធ្វើដំណើរតាមយន្តហោះទៅទីនោះដើម្បីប្រឈមមុខនឹងការគំរាមចាប់ខ្លួនក៏ដោយ។
ប៉ុន្តែ រឿងនេះបានប្រែប្រួលក្នុងខែមីនា នៅពេលដែលមានខ្សែអាត់សំឡេងដែលត្រូវគេចោទថា ធ្វើឡើងរវាងលោក សុខា អនុប្រធានគណបក្សសង្គ្រោះជាតិ និងស្រីស្នេហ៍របស់លោកត្រូវបានបែកធ្លាយនៅលើហ្វេសប៊ុក។ ក្នុងឃ្លិបមួយ បុរសម្នាក់អះអាងថា កញ្ញា សុវណ្ណថា កំពុងប្រើគណបក្សសង្គ្រោះជាតិ ដើម្បីបោកប្រាស់អ្នកគាំទ្រនៅសហរដ្ឋអាមេរិក។
ជាមួយនិស្សិតសាកលវិទ្យាល័យ ស្រី ចំរើន ដែលធ្វើយុទ្ធនាការបង្ខំឲ្យលោក សុខា ឆ្លើយតបនឹងការចោទប្រកាន់ថា លោកមានស្រីកំណាន់ ឬឲ្យលាលែងចេញពីតំណែងក្នុងគណបក្សសង្គ្រោះជាតិនោះ កញ្ញា សុវណ្ណថា ក៏បានចូលរួមយុទ្ធនាការនោះដែរ។
ចោទប្រកាន់លោក សុខា ថា ជួញដូរផ្លូវភេទ ចំពោះការនាំស្រីស្នេហ៍ទៅក្រុងបាងកក នាងក៏បានដាក់ពាក្យបណ្តឹងរដ្ឋប្បវេណីទារជំងឺចិត្ត១លានដុល្លារពីបទបរិហារកេរ្តិ៍ទាក់ទងនឹងការនិយាយផ្តោះផ្តងតាមទូរស័ព្ទ ហើយក៏អំពាវនាវឲ្យលោកអនុប្រធានបក្សរូបនេះចុះចេញពីតំណែងដែរ។
កញ្ញា សុវណ្ណថា បាននិយាយនៅក្នុងសន្និសីទកាសែតកាលពីខែឧសភា ដែលអង្គុយនៅក្បែរលោក ចំរើន ថា “បើបោះឆ្នោតឲ្យគណបក្សសង្គ្រោះជាតិ មានន័យថា គាំទ្រឲ្យមនុស្សថោកទាប ល្មោភកាម និងគំាទ្រអំពើសាហាយស្មន់”។
កញ្ញា សុវណ្ណថា បាននិយាយពីរបីថ្ងៃក្រោយមកថា “ប្រសិនបើ [លោក សុខា] ដឹកនាំប្រទេស ឬកាន់តំណែងខ្ពស់ ខ្ញុំគិតថា ប្រទេសជាតិនឹងពោរពេញទៅដោយអំពើអនាចារ។ ប្រសិនបើបក្សគ្មាន កឹម សុខា ក៏មិនរលាយដែរ”។
ទោះបីជាអ្នកគាំទ្រជាច្រើនបានបកស្រាយយុទ្ធនាការប្រឆាំងនឹងលោក សុខា ថាជាការវាយប្រហារដែលរៀបចំស៊ីសង្វាក់គ្នាបានយ៉ាងល្អិតល្អន់ដោយគណបក្សប្រជាជនកម្ពុជាក៏ដោយ ក៏កញ្ញា សុវណ្ណថា បាននិយាយដោយទទូចថា នាងនៅតែគាំទ្រគណបក្សសង្គ្រោះជាតិ ហើយរិះគន់មេដឹកនាំរបស់ខ្លួនដោយសារតែព្រួយបារម្ភអំពីកិត្តិនាមរបស់គណបក្ស។
ទោះជាយ៉ាងនេះក្តី ការវាយប្រហារភ្លាមៗទៅលើលោក សុខា នាំឲ្យប្រជាប្រិយភាពរបស់នាងធ្លាក់ចុះយ៉ាងគំហុក។ ក្នុងខែឧសភា អតីតអ្នកគាំទ្ររបស់នាងបានធ្វើយុទ្ធនាការដ៏ធំមួយដើម្បីចុច “មិនចូលចិត្ត” លើទំព័រនាង ដែលភ្លាមនោះក៏ត្រូវបានផ្អាក ចំពេលដែលនាងបង្កើនការធ្វើវេទិកាសាធារណៈរបស់អង្គការក្រៅរដ្ឋាភិបាលរបស់នាងតាមខេត្តនានា។
នៅពេលកញ្ញា សុវណ្ណថា បានបើកទំព័រឡើងវិញកាលពីខែមុន ការបង្ហោះសារដែលធ្លាប់តែមានប្រជាប្រិយភាពរបស់នាងបានក្លាយទៅជាវេទិកាតាមអុីនធើណិតសម្រាប់អ្នកគាំទ្រចាស់ៗរបស់នាងក្នុងការប្រកួតប្រជែងប្រើប្រាស់ពាក្យពេចន៍អាសអាភាសបំផុតដើម្បីវាយប្រហារនាងទៅវិញ។
ទោះជាយ៉ាងនេះក្តី ដោយបានធ្វើឲ្យមានកំហឹងដល់បណ្តាញអ្នកគាំទ្រគណបក្សប្រឆាំងដ៏ច្រើនលើសលប់ពេលកន្លងមកនោះ កញ្ញា សុវណ្ណថា ក៏បានមានអ្នកគាំទ្រថ្មីមួយចំនួនដែរស្ថិតនៅផ្នែកម្ខាងនៃគម្លាតនយោបាយ។
ស្ទើរតែពីរឆ្នាំចាប់តាំងពីការអំពាវនាវរបស់នាងឲ្យលោក ហ៊ុន សែន ចុះចេញពីតំណែង សកម្មជនរូបនេះបានទទួលការអបអរក្នុងសុន្ទរកថាមួយកាលពីថ្ងៃសុក្រ ដោយលោកនាយករដ្ឋមន្ត្រីដែលបានសរសើរការងារការពារបរិស្ថានរបស់នាងនៅក្នុងតំបន់អារែ៉ង ខេត្តកោះកុង។
លោក ហ៊ុនសែន បានមានប្រសាសន៍ថា “កញ្ញា ធី សុវណ្ណថា ដែលជាអ្នកលេងហ្វេសប៊ុក គាត់ធ្លាប់ដឹកនាំក្រុម ធ្វើដំណើរទៅតំបន់អារ៉ែង អ៊ីចឹងអាហ្នឹងជាចលនាជួយការពារមួយ ដូច្នេះជំរុញលើកទឹកចិត្តឱ្យពួកគាត់បន្តទៅ”។ កញ្ញា សុវណ្ណថា បានឆ្លើយតបដោយសរសើរលោកនាយករដ្ឋមន្ត្រីជាសាធារណៈជាលើកដំបូង។ កញ្ញា សុវណ្ណថា បានសរសេរថា “នាងខ្ញុំ ធី សុវណ្ណថា សូមថ្លែងអំណរគុណ គោរពជូនចំពោះសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានថ្លែងសរសើរនាងខ្ញុំក្នុងការពារព្រៃឈើនៅតំបន់អារ៉ែង”។
កញ្ញាបានសរសេរទៀតថា “នាងខ្ញុំសូមគោរពជូនពរសម្តេចតេជោ និងក្រុមគ្រួសារ មានសុខភាពល្អ និងទទួលបានជ័យជម្នះគ្រប់ឧបសគ្គ “។ លោក សុវិជ្ជា អ្នកចាត់ចែងយុទ្ធនាការគណបក្សសង្គ្រោះជាតិដែលបាននាំកញ្ញា ធី សុវណ្ណថា ឲ្យចូលបក្សក្នុងឆ្នាំ២០១៣ និងបម្រើការងារជាអគ្គលេខាធិការនៃគណៈកម្មាធិការអចិន្ត្រៃយ៍ បាននិយាយកាលពីថ្ងៃច័ន្ទថា ដំបូងលោកកត់សម្គាល់ឃើញភាពរឹងរូសរបស់សកម្មជនដែលមានប្រជាប្រិយភាព រូបនេះចំពោះគណបក្សសង្គ្រោះជាតិនៅដើមឆ្នាំ ២០១៤ លោក សុវិជ្ជា បាននិយាយដោយសំដៅទៅលើគណបក្សប្រជាជនកម្ពុជាថា “នាងចាប់ផ្តើមផ្លាស់ប្តូរក្រោយពីនាងមានបញ្ហាជាមួយ កឹម មនោវិទ្យា ហើយក៏ចាប់ផ្តើមទាក់ទង ផែ សុវណ្ណរិទ្ធ។ ផែ សុវណ្ណរិទ្ធ…. ធ្វើការជាមួយ ជា ចំរើន ដែលជាអ្នកនយោបាយជាន់ខ្ពស់ក្នុងគណបក្សប្រជាជនកម្ពុជា”។
លោកបាននិយាយថា “គេបានបង្កើតក្រុមនេះ ដើម្បីធ្វើកិច្ចការខ្លះរួមគ្នាគឺ ជា ចំរើន ស្រី ចំរើន ផែ សុវណ្ណារិទ្ធ និងធី សុវណ្ណថា។ គេធ្វើយុទ្ធនាការរួមគ្នា ដើម្បីវាយប្រហារគណបក្សសង្គ្រោះជាតិ និងកឹម សុខា”។ លោក សុវិជ្ជា បានអះអាងថា លោក សុវណ្ណារិទ្ធ និងលោក ស្រី ចំរើន ដែលមានវ័យក្មេងជាងបានជួបគ្នានៅឯសាកលវិទ្យាល័យដែលឥឡូវនេះបានបិទទ្វារទៅហើយរបស់លោក ចំរើន ដែលមានវ័យចំណាស់ជាង មុននឹងការបោះឆ្នោតក្នុងឆ្នាំ២០១៣ ពោលគឺមុននឹងនាំកញ្ញា សុវណ្ណថា ចូលទៅក្នុងក្រុមពួកគេ នៅពេលដែលគណបក្សសង្គ្រោះជាតិបានបណ្តេញនាងចេញ។
នៅតែជិតស្និទ្ធនឹងកញ្ញា សុវណ្ណថា ក្នុងអំឡុងពេលនាងស្ថិតនៅក្នុងគណបក្សសង្គ្រោះជាតិ លោក សុវិជ្ជា បាននិយាយថា ការពន្យល់តែមួយរបស់លោកចំពោះការប្តូរបក្សរបស់នាង គឺការសន្យាថានាងកាន់តែមានឈ្មោះល្បីល្បាញនិងមានទ្រព្យធន។
លោកបាននិយាយថា “នាងចង់បានលុយនិងផលប្រយោជន៍ អ៊ីចឹងទើបនាងទៅគណបក្សប្រជាជនកម្ពុជា។ បញ្ហាដែលបានកើតឡើងជាមួយនាង និង កឹម មនោវិទ្យា គឺជារឿងតូចតាចទេ។ អ្នកអាចពិចារណា វាជាការដោះសាដើម្បីវាយប្រហារគណបក្សសង្គ្រោះជាតិ”។
កញ្ញា សុវណ្ណថា ជាយូរមកហើយត្រូវញាំញីដោយសំណួរទាក់ទងនឹងប្រភពនៃទ្រព្យធនរបស់នាង ដោយមានអ្នករិះគន់កត់សម្គាល់លើការផ្សាយពាណិជ្ជកម្មតាមហ្វេសប៊ុករបស់នាង និងរថយន្តឡិចស៊ីស ស៊ីវថ្មីសន្លាងមួយគ្រឿងរបស់នាង ប៉ុន្តែ នាងតែងតែថា ប្រាក់កាក់ទាំងនោះគឺបានមកពីជំនួញគ្រួសារនាង។
ទំនាក់ទំនងផ្លាស់ប្តូររបស់កញ្ញា សុវណ្ណថា គឺមិនមែនជាបញ្ហាដែលមជ្ឈដ្ឋានភាគច្រើនចង់ពិភាក្សាពេលនេះទេ ដោយកញ្ញា មនោវិទ្យា ជាអនុប្រធានកិច្ចការសាធារណៈរបស់គណបក្សសង្គ្រោះជាតិ គឺចាប់តាំងពីខែតុលា ឆ្នាំ២០១៤មក បានបដិសេធមិននិយាយជាចំហទាក់ទិននឹងសកម្មជននេះទេ។
លោក សុវណ្ណារិទ្ធ ដែលក៏បានជួយដឹកនាំយុទ្ធនាការប្រឆាំងលោក សុខា ដែរ មិនបានឆ្លើយតបនឹងការស្នើសុំធ្វើអត្ថាធិប្បាយទេ។ កញ្ញា សុវណ្ណថា បានបដិសេធមិនឲ្យសម្ភាសពីរដង ដោយចុចបិទទូរស័ព្ទដាក់អ្នកយកព័ត៌មានម្តង ហើយបន្ទាប់មកកំណត់ការសម្ភាសដែលមិនបានកើតមានទេ។
លោក ចំរើន ជានិស្សិតសាកលវិទ្យាល័យវ័យក្មេង ដែលជាអ្នកធ្វើយុទ្ធនាការដ៏លេចធ្លោបំផុតប្រឆាំងលោក សុខា ក្នុងរយៈពេលប៉ុន្មានខែថ្មីៗកន្លងមកនេះ ក៏បដិសេធមិនឲ្យសម្ភាសដែរ។ ប៉ុន្តែ និស្សិតរូបនេះ មិនដែលបដិសេធថា ខ្លួនមិនមែនជាមិត្តភក្តិរបស់កញ្ញា សុវណ្ណថា ទេ គឺអ្នកទាំងពីរទាក់ទងគ្នាជាចំហនៅតាមទំព័រហ្វេសប៊ុករបស់គេចាប់តាំងពីដើមឆ្នាំ២០១៤។
លោក ចំរើន បាននិយាយក្នុងកិច្ចសម្ភាសកាលពីថ្ងៃទី២៥ ខែមីនាថា “ខ្ញុំស្គាល់នាងព្រោះយើងធ្លាប់ចូលរួមក្នុងសកម្មភាពសង្គមជាច្រើនជាមួយនាង។ ពេលណានាងចង់ទៅតំបន់ណាមួយ ឬចែកអំណោយពីមូលនិធិរបស់នាង ឬក៏ចុះទៅព្រំដែន យើងទៅជាមួយគ្នា”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ និងជាអ្នកតំណាងរាស្ត្រ ដែលដំបូងឡើយជំទាស់នឹងការបណ្តេញកញ្ញា សុវណ្ណថា បានមានប្រសាសន៍កាលពីថ្ងៃអង្គារថា លោកគ្មានយោបល់ទៅលើរឿងអ្វីដែលនាំឲ្យអតីតសកម្មជនលេចធ្លោរូបនេះងាកទៅរកគណបក្សប្រជាជនកម្ពុជានោះទេ។
លោកបានមានប្រសាសន៍ថា “ប្រវត្តិសាស្ត្រគឺជាប្រវត្តិសាស្ត្រ។ ទុកឲ្យពលរដ្ឋវិនិច្ឆ័យទៅចុះ គឺអ្នកអាចឃើញប្រតិកម្មនៅលើហ្វេសប៊ុករបស់នាងហើយ”៕
២៧ ខែមេសា ឆ្នាំ២០១៦ កញ្ញា ធី សុវណ្ណថា៖ ខ្ញុំប្តឹង លោក កឹម សុខា ដើម្បីឱ្យគាត់រាងចាល មិនបរិហារមនុស្សស្រីដទៃទៀត (ភ្នំពេញ)៖ បន្ទាប់ពីចូលបំភ្លឺនៅតុលាការក្រុងភ្នំពេញ នាព្រឹកថ្ងៃទី២៧ ខែមេសា ឆ្នាំ២០១៦នេះ កញ្ញា ធី សុវណ្ណថា បានបញ្ជាក់ថា នាងប្តឹងលោក កឹម សុខា អនុប្រធានគណបក្សសង្រ្គោះជាតិ គឺដើម្បីឱ្យគាត់ មានការរាងចាល មិនបរិហារទៅលើនារីដទៃទៀត។ កញ្ញា ធី សុវណ្ណថា បាននិយាយប្រាប់ក្រុមអ្នកសារព័ត៌មានយ៉ាងដូច្នេះថា «គាត់ជាមេដឹកនាំម្នាក់ ខ្ញុំចង់ឱ្យគាត់ មានការរាងចាល ទើបទាមទារសំណងច្រើនបែបនេះ ដើម្បីកុំឱ្យគាត់ចេះតែនិយាយ បរិហារទៅលើមនុស្សស្រីដទៃទៀត ដែលគេស្អាតស្អំ»។ កញ្ញា សុវណ្ណថា កាលពីថ្ងៃទី០១ ខែមីនា បានដាក់ពាក្យប្តឹងលោក កឹម សុខា ទៅកាន់សាលាដំបូងរាជធានីភ្នំពេញ ពីបទបរិហាកេរ្តិ៍តាមខ្សែអាត់សំឡេង ដែលត្រូវបានទម្លាយនៅក្នុងទំព័រ Facebook «រឿងពិត CNRP» និងប្រព័ន្ធផ្សព្វផ្សាយមួយចំនួន។ នាងប្តឹងទាមទារសំណងជំងឺចិត្ត១លានដុល្លារ។ នៅក្នុងខ្សែអាត់សំឡេងនោះ នាងចោទ លោក កឹម សុខា បានសន្ទនាជាមួយនារី ឈ្មោះ ខុម ចាន់តារាទី ហៅស្រីមុំ ដោយបរិហារកេរ្តិ៍របស់នាងថា បានយកឈ្មោះរបស់គណបក្សសង្រ្គោះជាតិ ដើម្បីសាងភាពល្បាញល្បី និងបោកយកលុយពីអ្នកគាំទ្រគណបក្សសង្រ្គោះជាតិ នៅក្រៅប្រទេស។ កញ្ញា ធី សុវណ្ណថា បានចាត់ទុកការលើកឡើងនេះថា ធ្វើឲ្យប៉ះពាល់ធ្ងន់ធ្ងរលើកិត្តិយស និងភាពថ្លៃថ្នូររបស់នាង៕
10 មិនា 2016 ភ្នំពេញ —ម្ចាស់ Facebook ឈ្មោះ Mon Srey បដិសេធថា ខ្លួនមិនមែនស្រីកំណាន់លោក កឹម សុខាទេ នារីវ័យក្មេងម្នាក់ដែលនៅចំចំណុចកណ្តាលនៃការចោទប្រកាន់លើលោកកឹម សុខា អនុប្រធានគណបក្សសង្គ្រោះជាតិបានចេញមុខមកអះអាងថាការចោទប្រកាន់រឿងរ៉ាវអាស្រូវផ្លូវភេទដែលបានធ្វើឱ្យភ្ញាក់ផ្អើលក្នុងបណ្តាញសង្គមនិងក្នុងប្រទេសកម្ពុជាគឺជារឿងប្រឌិតមួយប៉ុណ្ណោះ។
កញ្ញា ខំ ចាន់ដារាទី ឬកញ្ញា ស្រី មុំ ដែលគេចោទថាជាស្រីកំណាន់របស់លោក កឹម សុខា បានបង្ហាញខ្លួននៅថ្ងៃពុធនេះក្នុងការិយាល័យអង្គការសិទ្ធិមនុស្សអាដហុកដើម្បីបំភ្លឺករណីចោទប្រកាន់នេះ។ នាងបានបញ្ជាក់ក្នុងបទសម្ភាសជាមួយនឹង VOA ថា៖ «ខ្ញុំគិតថាគាត់(លោកកឹមសុខា) មានអាយុច្រើនជាងឱពុកម្តាយខ្ញុំទៅទៀត។ អីចឹងខ្ញុំអត់មានរឿងអីទៅគិតស្នេហាជាមួយគាត់ទេ។ ខ្ញុំអត់មានរឿងអីត្រូវទៅគិតអីចឹងទេ ហើយ គេថាស្រីកំណាន់របស់គាត់គឺខ្ញុំសូមបដិសេធថាខ្ញុំមិនមែនស្រីកំណាន់របស់គាត់ទេ»។ កញ្ញា ចាន់ដារាទី ទទួលស្គាល់ថានាងមានគណនីហ្វេសប៊ុកឈ្មោះ Mon Srey ក៏ប៉ុន្តែនាងបង្ហោះតែរូបថតទេព្រោះខ្លួនរៀនសូត្របានតែត្រឹមថ្នាក់ទី៤ហើយមិនចេះសរសរសារដែលមានខ្លឹមសារអ្វីឡើយ៖ «អ្វីដែលខ្ញុំផុសទៅគឺមានតែរូបភាពទេ។ ខ្ញុំអត់មានសមត្ថភាពណាទៅសរសេរអក្សរដែលមានអត្ថន័យថាគាត់មានស្នេហាជាមួយខ្ញុំហើយមានទំនាក់ទំនងជាមួយខ្ញុំហើយមិនទទួលខុសត្រូវជាមួយខ្ញុំគឺខ្ញុំអត់មានបានសរសេរទេ។ ហើយក៏អត់មានរឿងអ្វីកើតឡើងជាមួយខ្ញុំដែរ»។ បណ្តាញសង្គមនិងសារព័ត៌មានក្នុងប្រទេសកម្ពុជាបានដកស្រង់ការសន្ទនាតាមទូរស័ព្ទពីទំព័រហ្វេសប៊ុកមួយដែលមានឈ្មោះថា «រឿងពិត CNRP» ដែលគេចោទថាជាសំឡេងលោកកឹម សុខាសាសងស្នេហាជាមួយនឹងស្រ្តីដែលមានឈ្មោះមុំ។
នាង ចាន់ដារាទីបានបញ្ជាក់ថាលោកកឹម សុខាពិតជាធ្លាប់បានទូរស័ព្ទមកនាងក្នុងពេលកន្លងមកប៉ុន្តែគឺដើម្បីណាត់ពេលមកលាបថ្នាំសក់នៅហាងកាត់សក់ដែលនាងធ្វើការហើយក៏មានអតិថិជនជាច្រើននាក់ដែលមានលេខទូរស័ព្ទនាងនិងទូរស័ព្ទមកនាងក្នុងទំនាក់ទំនងការងារជាធម្មតាដែរ។
ហ្វេសប៊ុកដែលយកឈ្មោះនាងនិងដាក់រូបថតនាងប៉ុន្តែទើបបានបង្កើតតែក្នុងរយៈពេលពីរបីថ្ងៃមុនផ្ទុះរឿងអាស្រូវបានសរសេរចោទថាលោកកឹម សុខាបានធ្វើឱ្យនាងមានផ្ទៃពោះហើយមិនព្រមទទួលខុសត្រូវដោយលោកប្រែចិត្តសាវ៉ាទៅស្រឡាញ់នារីផ្សេងជាមិត្តភក្តិនាងវិញ។
នាង ចាន់ដារាទីបានបញ្ជាក់ថា៖ «អ្វីដែលគេសរសេរមកគឺខូចឈ្មោះរបស់ខ្ញុំអស់ហើយគឺកិត្តិយសរបស់ខ្ញុំបាត់បង់អស់ហើយ។ ....ខ្ញុំចង់បានកិត្តិយសខ្ញុំមកវិញព្រោះថាខ្ញុំខាតបង់ពេលវេលា។ ខាតបង់អ្នកដែលគេស្គាល់ខ្ញុំគេអត់ជឿជាក់លើខ្ញុំ»។
នៅពេលដែលបែកលេចចេញរឿងនោះដំបូង នាងបានបញ្ជាក់ថានាងចង់បកស្រាយរឿងហ្នឹងមួយរយៈដែរប៉ុន្តែមិនដឹងថាត្រូវធ្វើយ៉ាងណា។នាងបានបញ្ជាក់ថានាងស្លុតនៅពេលដែលរឿងរ៉ាវអាស្រូវនោះ ផ្ទុះឡើងហើយនាងបានរស់នៅដោយលាក់ខ្លួនដោយមានក្តីអាម៉ាស់។
ក្រសួងមហាបានកោះអញ្ជើញកញ្ញាចាន់ដារាទីឱ្យទៅបំភ្លឺនៅក្នុងបណ្តឹងរបស់សកម្មជនសង្គមវ័យក្មេងម្នាក់គឺនាង ធី សុវណ្ណថានៅថ្ងៃសុក្រខាងមុខ។ នាងធី សុវណ្ណថា បានដាក់ពាក្យបណ្តឹងដោយផ្អែកតាមខ្សែអាត់សំឡេងកន្លងមកដែលមានលក្ខណៈវាយប្រហារលើរូបនាង៕
10:06 AM 03.06.2017 ធី សុវណ្ណថា និងគូស្នេហ៍ រងការរិះគន់សារជាថ្មីម្តងទៀត យ៉ាងចាស់ដៃ ពីមហាជន ភ្នំពេញ ៖ ក្រោយពីលេចធ្លាយដំណឹងថា មិត្តប្រុសរបស់កញ្ញា ធី សុវណ្ណថា ទិញស្បែកជើងដែលមានតម្លៃ ៥០០០ ដុល្លារ បានធ្វើឲ្យមហាជនហួសចិត្តយ៉ាងខ្លាំង ព្រមទាំងរិះគន់យ៉ាងចាស់ដៃដល់អ្នកនយោបាយវ័យក្មេងរូបនេះ និងគូស្នេហ៍ ។ គួរបញ្ជាក់ឲ្យដឹងថា នេះមិនមែនជាលើកទីមួយទេ ដែល ធី សុវណ្ណថា រងការរិះគន់ពីសំណាក់អ្នកនិយមលេងបណ្តាញសង្គមហ្វេសប៊ុក ៕
14 November 2017 កញ្ញា ធី សុវណ្ណថា មានបំណងប្ដឹងក្រុមប្រឹក្សាជាប់ឆ្នោតបក្សប្រឆាំង ភ្នំពេញៈ អតីតសកម្មជនគណបក្សសង្គ្រោះជាតិបច្ចុប្បន្នជាសកម្មជននយោបាយល្បីក្នុងបណ្តាញហ្វេសប៊ុក កញ្ញា ធី សុវណ្ណថា បានបញ្ជាក់កាលពីម្សិលមិញថានាងមានបំណងប្ដឹងសមាជិកក្រុមប្រឹក្សាឃុំសង្កាត់ជាង ៥ ពាន់នាក់នៃគណបក្សប្រឆាំងដែលកំពុងកាន់តំណែងពីបទសមគំនិតនឹង «អំពើក្បត់ជាតិ» របស់លោក កឹម សុខា។ កញ្ញា ធី សុវណ្ណថា កាលពីម្សិលមិញបានថ្លែងថាក្រុមមេធាវីត្រូវបានស្នើសុំឲ្យសិក្សាទិដ្ឋភាពច្បាប់ថាតើអាចដាក់ពាក្យបណ្តឹងពីបទសមគំនិតប្រឆាំងនឹងសមាជិកក្រុមប្រឹក្សាឃុំសង្កាត់គណបក្សប្រឆាំងបានឬអត់ ប៉ុន្តែកញ្ញាបានថ្លែងថាកញ្ញានឹងរង់ចាំមើលលទ្ធផលសវនាការស្តីពីការរំលាយគណបក្សសង្គ្រោះជាតិ និងលទ្ធផលនៃការជំនុំជម្រះករណីលោក កឹម សុខា ពី «បទក្បត់ជាតិ»មុនពេលដាក់បណ្តឹង។ កញ្ញាថ្លែងថា៖ «សកម្មជនរបស់គណបក្សសង្គ្រោះជាតិដែលកំពុងបន្តចូលរួមជាមួយលោក កឹម សុខា និងគណបក្សសង្គ្រោះជាតិបង្ហាញយ៉ាងច្បាស់ថា មន្ត្រីឃុំសង្កាត់ជាង ៥ ពាន់នាក់កំពុងចូលរួម និងប្រព្រឹត្តអំពើក្បត់ជាតិជាមួយគណបក្សសង្គ្រោះជាតិ»។ ខណៈស្ទាក់ស្ទើរមិនឆ្លើយបន្ថែម កញ្ញា ធី សុវណ្ណថា បានយកហ្វេសប៊ុកដើម្បីប្រៀបធៀបសមាជិកក្រុមប្រឹក្សាឃុំសង្កាត់ទាំងនោះទៅនឹងជនសង្ស័យក្នុងផែនការក្បត់នៅតួកគីដែលប្រធានាធិបតី Tayyip Erdogan បានប្រមូលទាហាន នគរបាល ចៅក្រម មន្ត្រីរាជការ និងគ្រូបង្រៀនជិត ៦ ពាន់នាក់ពាក់ព័ន្ធនឹងរដ្ឋប្រហារយោធាបរាជ័យ។ កញ្ញា ធី សុវណ្ណថា ដំបូងទទួលបានប្រជាប្រិយភាពក្នុងគណបក្សសង្គ្រោះជាតិ។ ប៉ុន្តែបានមានបញ្ហា បន្ទាប់ពីតំណាងរាស្ត្របក្សសង្គ្រោះជាតិថាជាចារកម្មគណបក្សប្រជាជន។ ការគំរាមប្តឹងនេះគឺជាក្តីបារម្ភតិចតួចប៉ុណ្ណោះចំពោះកញ្ញា ស៊ិន រ៉ូហ្សិត ចៅសង្កាត់មកពីគណបក្សសង្គ្រោះជាតិក្នុងឃុំអូរចារ ខេត្តបាត់ដំបង។ កញ្ញា បានថ្លែងថា៖ «យើងមិនចង់ឆ្លើយតបនឹងអ្វីដដែលៗ។ ប្រសិនបើគេចង់ប្តឹង ប្តឹងទៅ»។ ស្រដៀងគ្នានេះដែរលោក ជិន សុខង៉េង ចៅសង្កាត់សាលាកំរើកក្នុងខេត្តសៀមរាបបានថ្លែងថា៖ «ខ្ញុំមិនដែលឃើញសារនយោបាយដែលគំរាមប្តឹង អ្នកមិនចុះចូលជាមួយពួកគេ។ វាមិនដែលមានក្នុងលោកនេះ»៕
០៦ ខែកក្កដា ឆ្នាំ២០១៧ តុលាការ ចេញដីកាកោះហៅ កញ្ញា ធី សុវណ្ណថា ចូលបំភ្លឺជុំវិញ ការដាក់ពាក្យប្តឹង លោក សាន្ត ប៊ុនធឿន (ភ្នំពេញ)៖ តំណាងអយ្យការអមសាលាដំបូងរាជធានីភ្នំពេញ លោក សេង ហៀង នាថ្មីៗនេះ បានចេញដីកាកោះហៅ កញ្ញា ធី សុវណ្ណថា ប្រធានអង្គការយុវជនដើម្បីសង្គម ចូលបំភ្លឺ នៅថ្ងៃទី ០៦ ខែកក្កដា ឆ្នាំ២០១៧ ខាងមុខនេះ ជុំវិញការដាក់ពាក្យប្តឹង លោក សាន្ត ប៊ុនធឿន ចាងហ្វាងកាសែតស្នេហាជាតិ។
យោងតាមដីការបស់ លោក សេង ហៀង ព្រះរាជអាជ្ញារងនៃតំណាងអយ្យការ អមសាលាដំបូងរាជធានីភ្នំពេញ បានបញ្ជាក់ថា កញ្ញា ធី សុវណ្ណថា ត្រូវចូលខ្លួនវេលាម៉ោង៩៖០០ព្រឹក ថ្ងៃទី០៦ ខែកក្កដា នៅបន្ទប់អក្ស «រ» ជាន់ទី២ របស់សាលាដំបូងរាជធានីភ្នំពេញ ដើម្បីបំភ្លឺចំពោះការចោទប្រកាន់ លោក សាន្ត ប៊ុនធឿន ពីបទញុះញង់្យប្រព្រឹត្តបទឧក្រិដ្ឋជាអាទិ៍។
សូមបញ្ជាក់ថា កាលពីថ្ងៃទី២៦ ខែមិថុនា ឆ្នាំ២០១៧ កន្លងទៅនេះ កញ្ញា ធី សុវណ្ណថា បានដាក់ពាក្យប្តឹង លោក សាន្ត ប៊ុនធឿន ដោយចោទប្រកាន់ពីបទញុះញង់្យប្រព្រឹត្តបទឧក្រិដ្ឋជាអាទិ៍។ ចំពោះការដាក់ពាក្យបណ្តឹងនេះ កញ្ញា ធី សុវណ្ណថា បានចោទ លោក សាន្ត ប៊ុនធឿនថា បាន Live វីដេអូ ជេរប្រមាថ បរិហាកេរ្តិ៍របស់នាង ព្រមទាំងចោទ លោក សាន្ត ប៊ុនធឿនថា រៀបចំផែនការព័ទ្ធឡាន និងចាត់ការតាមផែនការនេះ។
ទោះជាយ៉ាងណាក្តីរហូតដល់ពេលនេះ កញ្ញា ធី សុវណ្ណថា ដែលជាម្ចាស់ប្តឹងនេះ បានអះអាងថា កញ្ញា នាង យល់ព្រមឈប់ប្តឹងបន្តទៀត ដោយសារតែលោក សាន្ត ប៊ុនធឿន បានទទួលស្គាល់កំហុសចំពោះរឿងនេះ។
ប៉ុន្តែកញ្ញា អះអាងថា ទោះបីយ៉ាងណាលោក សាន្ត ប៊ុនធឿន នៅតែជាប់បណ្តឹងអាជ្ញា ប៉ុន្តែកញ្ញាអះអាងថានឹងចេញមុខការពារ ធានាឲ្យនៅក្រៅឃុំ បើសិនជាតុលាការសម្រេចឲ្យ លោក សាន្ត ប៊ុនធឿន ជាប់ពន្ធនាគារ។
កញ្ញា បានបញ្ជាក់ នៅលើទំព័រ Facebook នៅថ្ងៃទី៣០ ខែមិថុនា ឆ្នាំ២០១៧នេះ យ៉ាងដូច្នេះថា៖ «សាន្ត ប៊ុនធឿន អើយ... ដីកាកោះ ចេញហើយ អ្វីដែលខ្ញុំអាចជួយបងបាន គឺដាក់ពាក្យសុំ "ឈប់ប្តឹង" តែបណ្តឹងអាជ្ញារបស់តុលាកា នៅតែបន្តដំណើរការ បើតុលាការសម្រេចឲ្យបងជាប់គុក ខ្ញុំនឹងប្រើសិទ្ធិជាដើមបណ្តឹង សុំធានាបងឲ្យនៅក្រៅឃុំ»៕
1/6/2017 7:42 Pm ធីសុវណ្ណថា ដឹកនាំយុវជនជាង១០ម៉ឺននាក់ ចូលរួមជីវភាពនយោបាយ ជាមួយគណបក្សប្រជាជនកម្ពុជា កញ្ញា ធី សុវណ្ណថា បានសរសេរទៀតថា នាងខ្ញុំពិតជាមានការសោកស្តាយណាស់ ចំពោះពាក្យសម្តីខុសឆ្គងកន្លងមក ដោយនាងខ្ញុំនៅក្មេងគំនិតរាក់ និងបានទទួលការញុះញង់បណ្តុះបណ្តាលមនោគមវិជ្ជា ចងគំនុំហិង្សា (លាបពណ៌ជនជាតិខ្មែរ ថាជាយួន) ពីថ្នាក់ដឹកនាំគណបក្សសង្គ្រោះជាតិ។ នាងខ្ញុំសុំទទួលកំហុស និងសូមអភ័យទោសពីសម្តេច ឯកឧត្តម លោកជំទាវ លោកឧកញ៉ា ថ្នាក់ដឹកនាំ និងសមាជិកអ្នកគាំទ្រទាំងអស់នៃគណបក្សប្រជាជនកម្ពុជា។ សេចក្តីដូចបានគោរពជម្រាបជូនខាងលើ សូមសម្តេច មេត្តាផ្តល់ឱកាសឲ្យនាងខ្ញុំ សកម្មជនយុវជន និងអ្នកគាំទ្រជាង១០ម៉ឺននាក់ បានចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីបានចូលរួមរក្សាសន្តិភាព និងបានចូលរួមចំណែកជួយអភិវឌ្ឍន៍ប្រទេសជាតិយើង”៕
April 13, 2018 អបអរសាទរ! ធី សុវណ្ណថា ជាប់ចំណាត់ថ្នាក់លេខ១ក្នុងកម្មវិធី “រាជនីសម្រស់” នៅកូរ៉េឆ្នាំ២០១៨ បេក្ខនារី ធី សុវណ្ណថា និងបេក្ខនារី ១៣នាក់ទៀត បានចូលរួមប្រកួតកម្មវិធី Queen of the Spa Korea 2018 ដែលបានប្រារព្ធឡើងកាលពីម្សិលមិញ ថ្ងៃទី១២ ខែមេសា ឆ្នាំ២០១៨ នៅទីក្រុងសេអ៊ូល ប្រទេសកូរ៉េខាងត្បូង។
10:25 AM 04.10.2018 ភ្នំពេញ ៖ យោងតាមហ្វេសប៊ុកផេករបស់អ្នកនយោបាយវ័យក្មេងកញ្ញា ធី សុវណ្ណថា បានបង្ហោះរូបថតជាមួយនិងគូស្នេហ៍ ដោយភ្ជាប់មកជាមួយនិងចំណងជើងថា "យើងតស៊ូយ៉ាងលំបាក ស្រលាញ់គ្នា ៥ឆ្នាំ ឆ្លងកាត់បញ្ហា ឧបសគ្គតូចធំជាច្រើន រាប់មិនអស់ ថ្ងៃល្អ... របស់យើងខ្ញុំ ជិតមកដល់ហើយ" ។
2018-12-20 តុលាការកំពូលបន្តឲ្យលោក សម រង្ស៊ី ចាញ់ក្ដីលោក ហ៊ុន សែន ករណីសូកប៉ាន់ នាង ធី សុវណ្ណថា តុលាការកំពូលនៅព្រឹកថ្ងៃពុធ ទី១៩ ធ្នូ បានចេញសាលដីការក្សាសេចក្ដីសម្រេចសាលាឧទ្ធរណ៍ឲ្យ ប្រធានស្ដីទីគណបក្សសង្គ្រោះជាតិ លោក សម រង្ស៊ី ចាញ់ក្ដី មេដឹកនាំរបបក្រុងភ្នំពេញ លោក ហ៊ុន សែន នៅក្នុងសំណុំរឿង លោក ហ៊ុន សែន សូកប៉ាន់នាង ធី សុវណ្ណថា។
មេធាវីការពារក្តី ឲ្យលោក ហ៊ុន សែន គឺ លោកមេធាវី គី តិច ប្រាប់សារព័ត៌មានក្នុងស្រុកថា តុលាការកំពូលសម្រេច បដិសេធបណ្ដឹងសាទុក្ខ របស់មេធាវីការពារសិទ្ធិឲ្យលោក សម រង្សី ដោយហេតុផលទាស់នឹងគតិច្បាប់ តម្កល់សេចក្ដីសម្រេចក្នុងសាលដីការបស់សាលាឧទ្ធរណ៍ទុកជាបានការពេញទាំងមូល និងសាលដីកាតុលាការកំពូល ត្រូវប្រកាសជាសាធារណៈ នៅថ្ងៃទី១៩ ខែធ្នូ។
នេះជាបណ្ដឹងទី៧ ប្រឆាំងលោក សម រង្ស៊ី។ ដើមហេតុនៃបណ្ដឹងនេះ គឺ កាលពីថ្ងៃទី១៤ មករា ឆ្នាំ២០១៧ លោក សម រង្ស៊ី ថ្លែងថា លោក ហ៊ុន សែន បានសូកប៉ាន់ អតីតសកម្មជនគណបក្សប្រឆាំង ឈ្មោះ ធី សុវណ្ណថា ជាទឹកប្រាក់ ចំនួន ១លានដុល្លារ ជាថ្នូរនឹងការវាយប្រហារបក្សប្រឆាំង។ ក្នុងបណ្ដឹងនេះ លោក ហ៊ុន សែន ទារសំណងជំងឺចិត្តពីលោក សម រង្ស៊ី ចំនួន ១លានដុល្លារ ឯនាង ធី សុវណ្ណថា ក៏បានដាក់ពាក្យប្ដឹងដាច់ដោយឡែកមួយផ្សេងទៀតដែរ គឺទារសំណងជំងឺចិត្ត ចំនួន៥០ម៉ឺនដុល្លារ។ បណ្ដឹងបរិហារកេរ្តិ៍ជាសាធារណៈនេះ នៅដំណាក់កាលសាលាដំបូងរាជធានីភ្នំពេញ គឺ កាលពីថ្ងៃទី២៩ ខែធ្នូ ឆ្នាំ២០១៧ ចៅក្រមសម្រេចផ្ដន្ទាទោស លោក សម រង្ស៉ី ផាកពិន័យប្រាក់ចំនួន ១០លានរៀល និងបង្គាប់ឱ្យសងជំងឺចិត្តទៅដើមបណ្ដឹង គឺ លោក ហ៊ុន សែន ចំនួន ៤ពាន់លាន រៀល។ ចំណែកនៅដំណាក់កាលសាលាឧទ្ធរណ៍វិញ កាលពីថ្ងៃទី០៦ ខែមីនា ចៅក្រមបានសម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការទាំងអស់។ អាស៊ីសេរី បានព្យាយាមសុំការបញ្ជាក់ពីមេធាវីការពារក្ដី ឲ្យលោក សម រង្ស៊ី គឺ លោក មេធាវី សំ សុគង់ និង អ្នកនាំពាក្យតុលាការកំពូល លោក នៅ មុនីជោគ ជាច្រើនដង ប៉ុន្តែមិនលើកទូរស័ព្ទ។
លោក ហ៊ុន សែន ក៏ធ្លាប់ព្រមានរឹបអូសទ្រព្យសម្បត្តិ របស់ លោក សម រង្ស៊ី ដែរ ប្រសិនមិនសងលុយលោក តាមបង្គាប់របស់តុលាការ៕
Apr 10, 2018 ធី សុវណ្ណថាពីតារានយោបាយក្លាយជាតារាម៉ូឌែលត្រៀមខ្លួនរួចហើយសម្រាប់ការដើរបង្ហាញម៉ូដ សម័យលង្វែកកម្សាន្ត កញ្ញាធី សុវណ្ណថា គឺជាអ្នកលេងនយោបាយវ័យក្មេង មួយរូបដែលមានឈ្មោះបោះសម្លេង នៅលើបណ្ដាញសង្គមហ្វេបុក។កញ្ញាមិនត្រឹមតែមានភាពក្លាហានក្នុងការលេងនយោបាយតែប៉ុណ្ណោះទេ។តែកញ្ញា ធីសុវណ្ណថា មានរូបសម្រស់ស្រស់ស្អាត រាងរៅ ដៃជើងស្រឡូន សាកសមជាតារាម៉ូឌែលមែនទែន។បន្ទាប់ពីការទៅកែច្រមុះដល់ប្រទេសកូរ៉េ ធ្វើអោយសម្រស់របស់នាងស្រស់ស្អាតមួយកម្រិតទៀត។ឥលូវនេះកញ្ញា ធី សុវណ្ណថា បានវិវត្តន៍ខ្លួនពីអ្នកនយោបាយវ័យក្មេង ក្លាយទៅជាតារាម៉ូឌែលតំណាងអោយប្រទេសកម្ពុជា ក្នុងចំណោមបេក្ខជនទាំង 14នាក់ ដែលបានជាប់ដើម្បីធ្វើដំណើរទៅប្រកួត នៅក្នុងប្រទេសកូរ៉េ។
Oct 18, 2018 ប្រធានគណបក្សខ្មែរក្រោក William Guang ចាញ់ក្តីកញ្ញា ធី សុវណ្ណថា ផ្ទួនៗជាលើកទី២ និងត្រូវបានសាលាដំបូងរាជធានីភ្នំពេញ សម្រេចដាក់ឲ្យនៅក្រោមការត្រួតពិនិត្យរបស់តុលាការ
(ភ្នំពេញ)៖ អគ្គព្រះរាជអាជ្ញា អមសាលាឧទ្ធរណ៍ នៅថ្ងៃទី១៧ ខែតុលា ឆ្នាំ២០១៨ បានច្រានចោលបណ្តឹងរបស់ លោក សុខ សុវណ្ណវឌ្ឍនាសារពង្ស ប្រធានគណបក្សខ្មែរក្រោក ដែលប្តឹងកញ្ញា ធី សុវណ្ណថា ពីបទបរិហាកេរ្តិ៍ជាសាធារណៈ និងញុះញង់ឱ្យមានការរើសអើង ខណៈអយ្យការអមសាលាដំបូងរាជធានីភ្នំពេញដាក់លោកឲ្យស្ថិតក្រោមការ ពិនិត្យរបស់តុលាការ។
សេចក្តីសម្រេចរបស់អគ្គព្រះរាជអាជ្ញា អមសាលាឧទ្ធរណ៍ បានបញ្ជាក់យ៉ាងដូច្នេះថា៖ «តម្កល់ដីកាតម្កល់រឿងទុកឥតចាត់ការលេខ ១០២៣ អ.យ.ជ ចុះថ្ងៃទី២៣-០៥-២០១៨ របស់អយ្យការអមសាលាដំបូងរាជធានីភ្នំពេញ ទុកជាបានការដដែល»។
កញ្ញា ធី សុវណ្ណថា បានថ្លែងឲ្យដឹងយ៉ាងដូច្នេះថា៖ «លោក សុខ សុវណ្ណវឌ្ឍនាសារពង្ស ហៅ William Guang ប្តឹងនាងខ្ញុំ តាំងពីរាស្រ្ត រហូតដល់មានឋានៈស្មើទេសរដ្ឋមន្រ្តី នៅតែចាញ់នាងខ្ញុំ ហើយខ្ញុំសូមផ្តាំទៅលោក William Guang កុំច្រឡំដើរអួតក្អេងក្អាងប្រើប្រាស់តួនាទីជាទេសរដ្ឋមន្រ្តី ការពិតលោកគ្រាន់តែមានឋានៈស្មើតែប៉ុណ្ណោះ មិនមែនជាទេសរដ្ឋមន្រ្តីដូចមន្រ្តីរាជរដ្ឋាភិបាលនោះទេ សូមកុំច្រឡំឲ្យសោះ»។
សូមបញ្ជាក់ថា កាលពីថ្ងៃទី០១ ខែកុម្ភៈ ឆ្នាំ២០១៨ កន្លងទៅ លោក សុខ សុវណ្ណវឌ្ឍនាសារពង្ស ហៅ William Guang បានដាក់ពាក្យប្តឹងចោទប្រកាន់ កញ្ញា ធី សុវណ្ណថា ពីបទបរិហារកេរ្តិ៍ជាសាធារណៈ និងបទញុះញង់ឱ្យមានការរើសអើង ដោយចោទថាបានបរិហារកេរ្តិ៍លោក កាលពីថ្ងៃទី៣០ ខែមករា ឆ្នាំ២០១៨ នៅលើបណ្តាញសង្គម Facebook ឈ្មោះ Sovantha Thy។
នៅក្នុងពាក្យបណ្តឹងនោះផងដែរ លោក សុខ សុវណ្ណវឌ្ឍនាសារពង្ស ហៅ លោក វិល្លាម សូមអោយតុលាការផ្តន្ទាទោសជនប្រព្រឹត្តទៅតាមផ្លូវច្បាប់ និងទាមទារជំងឺចិត្ត ៥០០លានរៀល ដោយថវិការទាំងអស់នេះលោកសូមប្រគល់ទៅឱ្យមន្ទីរពេទ្យគន្ធបុប្ជា ដើម្បីប្រើប្រាស់ជាប្រយោជន៍សាធារណៈ។ ប៉ុន្តែទោះជាយ៉ាងនេះក្តី កាលពីថ្ងៃទី២៣ ខែឧសភា ឆ្នាំ២០១៨ អយ្យការអមសាលាដំបូងរាជធានីភ្នំពេញ ក៏បានសម្រេចទាត់ចោលពាក្យបណ្តឹងនេះដោយសារគ្មានភស្តុតាង។
សូមជំរាបថា កាលពីថ្ងៃទី២៨ ខែមីនា ឆ្នាំ២០១៨ អយ្យការអមសាលាដំបូងរាជធានីភ្នំពេញ បានសម្រេច៖ «ដាក់ឲ្យស្ថិតនៅក្រោមការពិនិត្យ លើឈ្មោះ សុខ វឌ្ឍនាសាប៊ុង ហៅ សុខ សុវណ្ណ វឌ្ឍនាសារពង្ស ភេទប្រុស ឆ្នាំកំណើត ១៤ មីនា ១៩៧៧ ជាម្ចាស់គណនីបណ្តាញទំនាក់ទំនងសង្គម Facebook ឈ្មោះ William Guang»៕
04:41 PM 04.04.2019 ធី សុវណ្ណថា ទប់ទឹកភ្នែកមិនបានទេព្រោះសោកស្តាយ ចំពោះកំហុសអតីតកាល ភ្នំពេញ ៖ ក្រោយពីបាត់មុខមួយរយៈធំ ពេលនេះអ្នកនយោបាយវ័យក្មេង កញ្ញា ធី សុវណ្ណថា បានបង្ហោះរូបថតជាច្រើនសន្លឹកជាមួយ សម្តេចអគ្គសេនាបតីតេជោ ហ៊ុនសែន ព្រមទាំងភ្ជាប់ជាមួយនិងសារប៉ុន្មានឃ្លា ដោយបង្ហាញពីភាពសោកស្តាយរបស់ខ្លួន នាពេលកន្លងទៅ ។ យោងតាមការបង្ហោះនៅលើហ្វេសប៊ុកផេក កញ្ញា ធី សុវណ្ណថា បានសរសេររៀបរ៉ាបថា "ក្នុងឱកាសខួបកំណេីត ៦៩ឆ្នាំ
នាងខ្ញុំ សូមគោរពជូនពរ សម្តេចតេជោមានសុខភាពល្អ ជោគជ័យគ្រប់ភារៈកិច្ច
រាល់ពេល នាងខ្ញុំបានជួបសម្តេចតេជោ នាងខ្ញុំមិនអាច ទប់ទឹកភ្នែកបានទេ
- ខ្ញុំសោកស្តាយ ចំពោះកំហុសអតីតកាលរបស់ខ្ញុំ
- ខ្ញុំបានទទួលការអនុគ្រោះ ក្តីមេត្តាដ៏ធំធេងពីសម្តេច
- ខ្ញុំបានឃេីញ សម្តេចខិតខំប្រឹងប្រែង ស្នេីរាល់ថ្ងៃ
ទាំងថ្ងៃយប់ រងាក្តៅ ញេីសហូរជោគខ្លួន ធ្វេីដំណេីរ
គ្រប់ច្រកល្ហក ក្នុងនិងក្រៅប្រទេស ខិតខំក៏សាង
សេដ្ឋកិច្ចជាតិ និងប្រជាជនកាន់តែរីកចំរេីន
កំចាត់មន្ត្រីខិលខូច កែទម្រង់ដឹកនាំប្រទេសជាតិ
កាន់តែប្រសេីរ មានសុខសន្តិភាព
គុណូបការៈដ៏ធំធេង របស់សម្តេចតេជោ ហ៊ុន សែន
នាងខ្ញុំ ជាយុវជនជំនាន់ថ្មី សម័យក្រោយសង្គ្រាម
ចងចាំ ដឹងគុណ ជានិរន្ត
សម្តេចតេជោ ហ៊ុន សែន
គឺជាព្រះរស់ នៃប្រជាជនខ្មែរគ្រប់គ្នា" ៕
26 January 2018 កញ្ញា ធី សុវណ្ណថា គំរាមប្តឹងនាយក Wildlife Alliance ភ្នំពេញៈ នាយកប្រតិបត្តិនៃអង្គការសត្វព្រៃ (Wildlife Alliance) កញ្ញា Suwanna Gauntlett ត្រូវបានកញ្ញា ធី សុវណ្ណថា គំរាមប្ដឹងពីបទ «រើសអើង» ដោយទាមទារសំណង ១០ ម៉ឺនដុល្លារ ដោយសារនាយកប្រតិបត្តិរូបនេះ បានបដិសេធវត្តមានកញ្ញា ធី សុវណ្ណថា ចូលរួមក្នុងកម្មវិធីបោះជំរំនៅតំបន់ អារ៉ែង នៅថ្ងៃទី ២៦ ខែមករា ឆ្នាំ ២០១៨ នេះ។
កញ្ញា ធី សុវណ្ណថា ប្រធានអង្គការយុវជនកិច្ចការសង្គម និងជាប្រធានគណៈកម្មការយុវជនសាខាបក្សនៃគណបក្សប្រជាជនកម្ពុជា បានប្រាប់ភ្នំពេញប៉ុស្ដិ៍ កាលពីម្សិលមិញថា កញ្ញានឹងប្តឹងកញ្ញា Suwanna Gauntlett នាយកប្រតិបត្តិអង្គការសម្ព័ន្ធភាពសត្វព្រៃឈ្មោះថា (Wildlife Alliance)ទៅតុលាការខេត្តកោះកុងពីបទ «រើសអើង» តាមមាត្រា ២៦៥ ដោយសារកញ្ញា Suwanna Gauntlett បានបដិសេធវត្តមានកញ្ញាក្នុងការបោះជំរំនៅតំបន់អារ៉ែង បើទោះបីជាកញ្ញាត្រូវបានអនុញ្ញាតពីលោកស្រី មិថុនា ភូថង អភិបាលខេត្តកោះកុងរួចរាល់ក៏ដោយ។
កញ្ញា បញ្ជាក់ថា៖ «ខ្ញុំអត់ដឹងពីមូលហេតុច្បាស់លាស់ទេ ដែលប្រធានអង្គការមិនចង់ឲ្យខ្ញុំទៅចូលរួមបោះជំរំនៅតំបន់ អារ៉ែង នៅពេលដែលខ្ញុំបានសួរទៅគាត់វិញ គាត់គ្រាន់តែនិយាយថា ខ្ញុំហ្នឹងមានឈ្មោះល្បីស្រាប់ហើយ មិនបាច់ទៅជាមួយក្រុមការងារគាត់ទៀតទេ។ ប៉ុន្ដែខ្ញុំគិតថា ប្រហែលជាគាត់ខឹងខ្ញុំរឿងខ្ញុំបានប៉ះទង្គិចគ្នាជាមួយបុគ្គលិកគាត់កាលពីពេលជួបជាមួយសម្ដេចម្ល៉េះ ព្រោះពេលនោះខ្ញុំបាននិយាយរឿងកំហុសឆ្គងពីអង្គការរបស់គាត់ច្រើន»។
កញ្ញា ធី សុវណ្ណថា ក៏បានសរសេរសារនៅលើ ហ្វេសប៊ុក របស់នាងដែរថា៖ «នាងខ្ញុំទទួលការ«រើសអើង» និងការប្រមាថដ៏ធ្ងន់ធ្ងរពីលោកស្រី Suwanna Gauntlett នាយកប្រតិបត្តិនៃអង្គការ Wildlife Alliance បានបដិសេធវត្តមានខ្ញុំក្នុងការបោះជំរំ នៅតំបន់ អារ៉ែង ថ្ងៃទី ២៦ ខែមករានេះ ដោយនាងខ្ញុំបានទទួលការអនុញ្ញាតពីលោកជំទាវអភិបាលខេត្តកោះកុង មិថុនា ភូថង រួចរាល់ហើយ។ តើលោកស្រីជានរណា? មានសិទ្ធិអ្វីបដិសេធវត្តមានខ្ញុំ? នេះជាការប៉ះពាល់ធ្ងន់ធ្ងរលើកិត្តិយសរបស់ខ្ញុំ ខ្ញុំទុកពេលឲ្យលោកស្រី ៣ ថ្ងៃធ្វើលិខិតសុំទោសខ្ញុំ ជាសាធារណៈ និងផ្តល់ប្រាក់សងជំងឺចិត្តខ្ញុំ ១០ ម៉ឺនដុល្លារ បើលោកស្រីមិនព្រមខ្ញុំនឹងប្តឹងលោកស្រីទៅតុលាការខេត្តកោះកុងពីបទ «រើសអើង...»។
កញ្ញា Suwanna Gauntlett នាយកប្រតិបត្តិនៃអង្គការសម្ព័ន្ធភាពសត្វព្រៃដែលមានឈ្មោះថា (Wildlife Alliance) កាលពីម្សិលមិញមិនអាចទាក់ទងសុំការបញ្ជាក់បន្ថែមបានទេ ប៉ុន្តែមន្ត្រីម្នាក់ នៃអង្គការនេះ និយាយថា៖ «ប្រធានខ្ញុំ បានដឹងពីការអនុញ្ញាតរបស់អាជ្ញាធរខេត្ត ឲ្យកញ្ញាបានចូលរួមរួចរាល់ហើយ ប៉ុន្ដែប្រធានខ្ញុំ គាត់បានប្រាប់ថា កញ្ញា សុវណ្ណថា កុំទាន់អញ្ជើញទៅពេលនេះអីចាំលើកក្រោយចាំទៅ។ ខ្ញុំចង់ជម្រាបកញ្ញាថា មូលហេតុដែលមិនទាន់ចង់ឲ្យកញ្ញាចូលរួមនេះ គឺដោយសារវាជាគម្រោងសហគមន៍អ៊ីចឹងគាត់ចង់បានចំណាប់អារម្មណ៍របស់ភ្ញៀវ ផ្ដោតលើសហគមន៍ឲ្យបានច្រើន ព្រោះវាជាគម្រោងទី ១ របស់អង្គការ។ ម្យ៉ាងទៀត កញ្ញាជាបុគ្គលធ្វើនយោបាយ ហើយគាត់ក៏គិតដែរថា កញ្ញា សុវណ្ណថា ជាបុគ្គលល្បីឈ្មោះ ហើយគាត់ក៏មិនចង់ឲ្យភ្ញៀវផ្ដោតអារម្មណ៍លើសុវណ្ណថា ច្រើនពេកទេ។ អ៊ីចឹងសូម សុវណ្ណថា មេត្តាយោគយល់ផង ព្រោះនេះជាគម្រោងរបស់សហគមន៍»។
លោកស្រី មិថុនា ភូថង អភិបាលខេត្តកោះកុងថ្លែងថា លោកស្រីមិនបានដឹងពីការហាមកញ្ញា សុវណ្ណថា មិនឲ្យចូលរួមនោះទេ។ «កម្មវិធីនេះ គេអញ្ជើញខ្ញុំដែរ ដើម្បីចូលរួមជាមួយយុវជន ក្នុងការសិក្សាស្វែងយល់ពីសក្ដានុពលនៃតំបន់អារ៉ែង និងជីវិតជីវៈចម្រុះផ្សេងៗនៅកម្ពុជា»៕
ថ្ងៃទី6 ខែវិច្ឆិកា ឆ្នាំ2019 នោះ! លោក ហេង ឡុង ព្រមសុំទោសអ្នកនាង ធី សុវណ្ណថា និងលោក ផែ សុវណ្ណរិទ្ធ ហើយ ក្រោយអវត្តមាននារីឈ្មោះ ចរិយា នៅក្នុងសន្និសិទការសែតយប់នេះ (ភ្នំពេញ)៖ តាមរយៈសន្និសិទការសែតនៅក្នុងយប់នេះ ត្រូវបានបិទបញ្ចប់ គេឃើញថា សាច់រឿងស្នេហាត្រីកោណ រវាង អ្នកនាង ធី សុវណ្ណថា លោក ផែ សុវណ្ណរិទ្ធ និងកញ្ញា ចរិយា គឺអាចស្វែងយល់បានខ្លះៗហើយ ពីជម្លោះក្នុងរយៈ ពេលប៉ុន្មានថ្ងៃនេះ ។
ផ្អែកតាមសន្និសិទការសែតនៅយប់នេះ គេសង្កែតឃើញថា កញ្ញា ចរិយា គឺមិនបានបង្ហាញវត្តមាននៅក្នុងសន្និសិទការ សែត ដូចទៅនិងអ្វីដែលនាងបានសន្យាយ៉ាងម៉ឺងម៉ាត់នោះទេ។ គឺមានតែលោក ហេង ឡុង អ្នកនាង ធី សុវណ្ណថា និងលោក ផែ សុវណ្ណរិទ្ធ តែប៉ុណ្ណោះ ដែលមានវត្តមាននៅក្នុងសន្និសិទក្នុងយប់នេះ។
ការមិនចូលរួមនិយាយតទល់មុខគ្នា តាមការសន្យារបស់នារីឈ្មោះ ចរិយា គឺជាការសបញ្ចក់ថា កញ្ញា ចរិយា គឺជាមនុស្សមិនស្មោះត្រងនោះទេ ដែលគេអាចគិតថា នាងគឺមានគោលបំណងមិនល្អ ក្នុងការប្រឌិតជម្លោះស្នេហា ការបង្កើតរឿងបរិហាកេរ្តិ៍ ដើម្បីបំផ្លាញកិត្តិយសរបស់អ្នកនាង ធី សុវណ្ណថា និងលោក ផែ សុវណ្ណរិទ្ធ តែប៉ុណ្ណោះ។
ហេតុអ្វីបានជាត្រូវសង្ស័យបែបនេះ? ព្រោះថា នៅក្នុងសន្និសិទការសែតយប់នេះ អ្នកនាង ធី សុវណ្ណថា បានលើកយក ចំណុចសង្ស័យជាច្រើនចំណុចដែលទាក់ទងទៅនឹងការបកស្រាយ របស់កញ្ញា ចរិយា ដែលបានចោទប្រកាន់ថា លោក ផែ សុវណ្ណរិទ្ធ មានទំនាក់ទំនងស្នេហាជាមួយខ្លួនជាង៩ឆ្នាំមកហើយ ក៏ប៉ុន្តែគេបានដឹងថា កញ្ញា ចរិយា នៅ ពេលនេះ គឺមានអាយុត្រឹមតែ២១ឆ្នាំតែប៉ុណ្ណោះ។
មូលហេតុដ៏គួរអោយចាប់អារម្មណ៍មួយទៀតនោះ កញ្ញា ធី សុវណ្ណថា បាននិយាយថា នាងគឺមានទំនាក់ទំនងស្នេហា ជាមួយលោក ផែ សុវណ្ណរិទ្ធ ជាង៦ឆ្នាំមកហើយ មានផុសរូបជាមួយគ្នា ដើរលេងជាមួយគ្នាទាំងក្នុង និងក្រៅប្រទេសជា មួយគ្នាយ៉ាងច្បាស់លាស់ ចុះហេតុអ្វីក៏កញ្ញា ចរិយា មិនព្រមសើរើរឿងស្នេហានេះ បែរជាដល់ថ្ងៃមង្គលការនាង ទើបនាង ចរិយា បង្កើតរឿងរ៉ាងបែបនេះ ដែលនេះ គឺជាចេតនាចង់បំផ្លាញកិត្តិយស និងសេចក្តីសុខរបស់នាងយ៉ាង ពិតប្រាកដ។
ចំណែកលោក ផែ សុវណ្ណរិទ្ធ ក៏បានបដិសេដទាំងស្រុងផងដែរ នៅចំពោះមុខអ្នកសារព័ត៌មាន ដោយលោកថា មិនដែលធ្លាប់មានទំនាក់ទំនងជាមួយនារីឈ្មោះ ចរិយា នោះឡើយ។លោកថា កញ្ញា ចរិយា អាចនិងចងគំនុំជាមួយអ្នក នាង ធី សុវណ្ណថា ហើយយករូបលោកបង្កើតជារឿងបែបនេះតែម្តង។
ជុំវិញសន្និសិទការសែតនេះដែរ លោក ហេង ឡុង បានលើកឡើងថា លោកពិតជាសុំទោសយ៉ាងខ្លាំងចំពោះរឿងរ៉ាង ដែលបានកើតឡើង។លោកទទួលស្គាល់ថា លោក មិនសមយកថ្ងៃមង្គលការរបស់អ្នកនាង ធី សុវណ្ណថា និងលោក ផែ សុវណ្ណរិទ្ធ មកបង្កើតរឿងនៅថ្ងៃនោះនោះទេ ។លោក ហេង ឡុង បន្តថា លោកព្រមដោះស្រាយតាមច្បាប់ ធ្វើម្តេចបើ អ្នកនាង ធី សុវណ្ណថា ខឹងយ៉ាងនេះហើយ។
ជារួមមក ទោះយ៉ាងណាក៏ដោយ ក៏អ្នកនាងធី សុវណ្ណថា និងលោក ផែ សុវណ្ណរិទ្ធ នៅតែដាក់ពាក្យបណ្តឹងដដែល ដើម្បីដោះស្រាយគ្នាទៅតាមច្បាប់ ដើម្បីរក្សាកិត្តិយសក្រុមគ្រួសារទាំងសងខាងរបស់នាងអោយខានតែបាន៕យើង នឹងរងចាំមើលភាគបន្ត ថាតើរឿងមួយនេះ នឹងទៅជាយ៉ាងណាទៀត?។(Swift News ពេជ្រ វុឌ្ឍា)
No comments:
Post a Comment