តើប៉ែន សុវណ្ណជានណា? ខ្លះថា ប៉ែនសុវណ្ណជាខ្មែរក្រហម ខ្លះថា ជាខ្មែរកម្មុយនីស្ត ខ្លះថាប៉ែន សុវណ្ណជាខ្មែរសេរី ខ្លះថាប៉ែន សុវណ្ណជាខ្មែរយួន ដោយសារគាត់ជាកូនប្រសារប្រធានាធិបតីយួន...ជាសង្ខេប ប៉ែនសុវណ្ណប្រឆាំងបារាំង ប្រឆាំងជប៉ុន ប្រឆាំងវៀតណាមខាងជើង ប្រឆាំងចិន ប្រឆាំងស្តេចសីហនុ ប្រឆាំង ក្រុមសមសារី សមរង្សី ប្រឆាំង របបខ្មែរក្រហម ចុងក្រោយប្រឆាំង របបសាធារណរដ្ឋប្រជាមានិតកម្ពុជាដែលខ្លួនឯងចូលរួមបង្កើតជារណសិរ្ស ! ប្រឆាំងរាជរដ្ឋាភិបាលក្រោយការបោះឆ្នោត ១៩៩៣ ប្រឆាំង រដ្ឋាភិបាល អាណត្តិក្រោយ រហូតដល់ថ្ងៃស្លាប់ គឺប្រឆាំងលុះក្ស័យ !!! មុនពេលស្លាប់ មានគេតាមសម្លាប់ ដូចជា ក្រុមអៀងសារី តាមសម្លាប់ ប៉ែនសុវណ្ណឆ្នាំ ១៩៧៤ ដែលនាំឲ្យប៉ែន សុវណ្ណក្លាយជាជនបេះបោរជាមួយ ជនភៀសខ្លួនជាង ១៥ ម៉ឺននាក់នៅ ទឹកដីវៀតណាម។ ពេលចូលស្រុកវិញឆ្នាំ ១៩៩២ ពួកអ្នកតស៊ូ តែងតែព្យាយាមបង្ខំវៀតណាមឲ្យដោះលែងសកម្មជន អ្នកទោសនយោបាយ គឺសំដៅប៉ែន សុវណ្ណនេះឯង ក្រោយមកប៉ែន សុវណ្ណចូលជាមួយ សម រង្សី បន្ទាប់ចូលជាមួយ កឹម សុខាវិញ ចុងក្រោយ ពេល កឹមសុខា សមរង្សីរួមគ្នា បែនសុវណ្ណមានឲកាសបានក្លាយជាតំណាងរាស្រ្ត នេះបញ្ជាក់ថា ប៉ែនសុវណ្ណមិនមែនក្រុម សមរង្សី ក៍មិនមែនក្រុម កឹម សុខា គឺជាក្រោម ខ្មែរសេរីបែបសូវៀត !!!
លោក ប៉ែន សុវណ្ណ ជាអ្នកនយោបាយលេចធ្លោមួយរូបនៅក្នុងសង្គមកម្ពុជា កាលពីចុងទសវត្សឆ្នាំ១៩៧០ និងដើមទសវត្សឆ្នាំ១៩៨០។ ការលេចធ្លោរបស់លោក គឺដោយសារតែលោកជាមេដឹកនាំមួយរូបនៃរណសិរ្សសាមគ្គីសង្គ្រោះជាតិកម្ពុជា កៀកស្មាគ្នាជាមួយកងទ័ពវៀតណាម វាយលុកចូលកម្ពុជា ផ្ដួលរំលំរបបខ្មែរក្រហមនៅដើមឆ្នាំ១៩៧៩ ហើយវៀតណាម បានលើកបន្តុបលោកជានាយករដ្ឋមន្ត្រីនៃរបបថ្មីគឺសាធារណរដ្ឋប្រជាមានិតកម្ពុជា នៅពេលនោះ។
លោក ប៉ែន សុវណ្ណ ធ្លាប់ជានាយករដ្ឋមន្ត្រីទី១ នៃរបបសាធារណរដ្ឋប្រជាមានិតកម្ពុជា ពីចុងខែមិថុនា ដល់ដើមខែធ្នូ ឆ្នាំ១៩៨១។ សម័យកាលដែលលោកធ្វើជានាយករដ្ឋមន្ត្រីនោះ គឺប្រទេសកម្ពុជា ស្ថិតនៅក្រោមការត្រួតត្រារបស់កងទ័ពវៀតណាម។
ក្នុងបទសម្ភាសន៍ជាមួយវិទ្យុអាស៊ីសេរី នៅឆ្នាំ២០០៧ លោក ប៉ែន សុវណ្ណ ឲ្យដឹងថា លោកកើតនៅថ្ងៃទី១៥ ខែមេសា ឆ្នាំ១៩៣៦ នៅភូមិចានទាប ឃុំសំរោង ស្រុកត្រាំកក់ ខេត្តតាកែវ។ លោកកើតក្នុងគ្រួសារកសិករក្រីក្រ ដែលធ្វើស្រែតិចតួច និងលក់កម្លាំងពលកម្ម។ លោកជាកូនទី៣ ក្នុងចំណោមបងប្អូន ៧នាក់។ នៅអាយុ ១០ឆ្នាំ លោកចាកចេញពីគ្រួសារទៅនៅស៊ីឈ្នួលមើលគោឲ្យគ្រួសារអ្នកមានមួយ។ ដោយសារការរស់នៅទីនោះលំបាក លោកក៏ចាកចេញទៅនៅជាមួយព្រះសង្ឃនៅវត្តផ្ចឹកជ្រំ រហូតដល់វ័យ ១៥ឆ្នាំ។
លោកបានចូលប្រឡូកក្នុងចលនានយោបាយដោយមិនបានដឹងខ្លួននៅឆ្នាំ១៩៥០ (ថ្ងៃទី៣ ខែកុម្ភៈ) គឺនៅពេលលោកចូលរួម ចលនាតស៊ូឥស្សរៈ តាមការពន្យល់របស់ម្ដាយលោក ដែលយល់ថា ចលនានោះជាចលនាល្អ។ ក្នុងវ័យ ២៤ឆ្នាំ លោក ប៉ែន សុវណ្ណ ថ្លែងថា ពេលនោះលោកមិនយល់ពីបញ្ហានយោបាយឥណ្ឌូចិន ៣ប្រទេសទេ ប៉ុន្តែលោកគ្រាន់តែដឹងថា លោកត្រូវចូលរួមចលនាវាយបណ្ដេញពួក អាណានិគមនិយម ឈ្លានពានក្រៅប្រទេស វាយរំលំរបបជិះជាន់ ប្រជាពលរដ្ឋកសិករប៉ុណ្ណោះ។
លោកមើលឃើញថា អាណានិគមរបស់អធិរាជជប៉ុន និងបារាំង ពេលនោះបានធ្វើបាបជិះជាន់ពលរដ្ឋកម្ពុជា ហើយពួកឥស្សរៈដែលចូលមកក្នុងភូមិរបស់លោកចេះជួយយកអាសាអ្នកស្រុក៖ «ខ្ញុំយល់តែមួយទេ គឺត្រូវរួមចំណែកតស៊ូវាយបណ្ដេញពួកអាណានិគមនិយមឈ្លានពានក្រៅប្រទេស និងរំលំរបបជិះជាន់ប្រជាពលរដ្ឋកសិករ។ កាលហ្នឹងនយោបាយ គឺខ្ញុំអត់ដឹងសោះថា ប្រទេសណាជាប្រទេសណា ខ្ញុំពេលនោះនៅតូច ដឹងស្ថានភាពនៅប្រទេសតែប៉ុណ្ណឹងទេ។ ខ្ញុំបានអាហ្នឹងហើយ ខ្ញុំកំណត់ឃើញថា ចលនារបស់ឥស្សរៈមានគោលដៅមួយវាយបណ្ដេញពួកអាណានិគមក្រៅប្រទេស អាហ្នឹងគឺបារាំង ហើយវាយវណ្ណៈជិះជាន់ កាលហ្នឹងខ្ញុំហៅថា វណ្ណៈសក្ដិភូមិជិះជាន់សង្កត់សង្កិនប្រជាពលរដ្ឋក្រីក្រ»។
លោកបញ្ជាក់ថា ក្រុមឥស្សរៈដែលលោកចូលរួមនោះ គឺជា ក្រុមរបស់តា ម៉ុក ដែលលោកស្គាល់ឈ្មោះផ្សេងទៀតថា ឈិត ជឿន អ៊ុង ជឿន និង ឯក ជឿន។ លោកបានធ្លាប់ជាធ្វើការងារចម្រុះ និងជាអង្គរក្សរបស់តា ម៉ុក ពីឆ្នាំ១៩៥០ ដល់ឆ្នាំ១៩៥៣។
ក្រោយពេលកម្ពុជា ទទួលបានឯករាជ្យពីបារាំង (សន្ធិសញ្ញាឯករាជ្យក្រុងហ្សឺណែវ) នៅឆ្នាំ១៩៥៤ លោកជាមនុស្សម្នាក់ក្នុងចំណោមយុវជន យុវនារីចំនួន ១.០៤០នាក់ ដែលត្រូវបានមេចលនាកុម្មុយនិស្តឥស្សរៈភូមិភាគនិរតី គឺតា ម៉ុក បញ្ចុះបញ្ចូលឲ្យទៅរៀនវិជ្ជាជីវៈយោធានៅខេត្តថាញ់វ៉ា (Thanh Hoa) វៀតណាមខាងជើង៖ «គេយកខ្ញុំទៅបណ្ដុះបណ្ដាលនាយទាហានថ្នាក់ក្រោម គឺនាយទាហានត្រឹមកងអនុសេនាតូច។ ខ្ញុំបានចូលបណ្ដុះបណ្ដាលនាយទាហានហ្នឹង គេឲ្យខ្មែរពួកខ្ញុំហ្នឹងមួយក្រុមជំនាញការកងទ័ពជើងគោកទំនើបមានខ្ញុំហ្នឹង មានគ្នា ៥៤នាក់។ ៥៤នាក់ហ្នឹង ខ្ញុំទៅដំបូង គេឲ្យរៀនភាសាវៀតណាម អក្សរវៀតណាម ដើម្បីចូលរៀនបច្ចេកទេស»។
លោកថា មូលហេតុជំរុញលោកនៅពេលនោះ ទោះជាអាណានិគមបារាំង បានចាកចេញពីកម្ពុជា ពិតមែន ប៉ុន្តែវណ្ណៈជិះជាន់នៅតែមាន។
នៅក្រោយព្រឹត្តិការណ៍រដ្ឋប្រហារទម្លាក់សម្ដេចព្រះ នរោត្ដម សីហនុ ឆ្នាំ១៩៧០ លោកត្រូវបានពួកកុម្មុយនិស្តខ្មែរ ទាក់ទងទៅវៀតណាម ខាងជើងបញ្ជូនពួកលោកមកជួបក្រុមកុម្មុយនិស្តកម្ពុជា ដូចជា លោក អៀង សារី អ្នកស្រី អៀង ធីរិទ្ធ និងលោក ទីវ អុល ជាដើម។ ពេលនោះ លោកត្រូវបានគេចូលទៅក្នុងក្រសួងឃោសនាការរបស់រណសិរ្សរួបរួមជាតិកម្ពុជា ដែលមានសម្ដេចព្រះ នរោត្ដម សីហនុ ជាព្រះប្រធាន នៅតាមខេត្តភាគខាងជើងប្រទេសកម្ពុជា។
លោក ប៉ែន សុវណ្ណ អះអាងថា លោកជាអ្នកនិពន្ធ និងជាអ្នកបកប្រែភាសាវៀតណាម នៅក្នុងវិទ្យុផ្សាយសំឡេងនៃក្រសួងឃោសនាការ ចលនារណសិរ្សរួបរួមជាតិកម្ពុជា នោះ ដែលមានជំនាញការវៀតណាម គ្រប់គ្រងបច្ចេកទេស៖ «អារឿងនិពន្ធអត្ថបទ រឿងបកប្រែពីខ្មែរទៅវៀតណាម ពីវៀតណាម ទៅខ្មែរ គឺខ្ញុំពូកែ។ ខ្ញុំមើលកាសែតវៀតណាម បកចេញខ្មែរតែម្ដង។ គេឃើញខ្ញុំពូកែ គេយកខ្ញុំធ្វើបច្ចេកទេស ដើម្បីជួយវិទ្យុផ្សាយសំឡេងវៀតណាម ហើយនិងជួយមន្ត្រីគេ ដែលអានអក្សរមិនត្រូវ ឬថាតែងអត់ត្រូវ ឲ្យខ្ញុំជួយតម្រង់ជំនាញការគ្រូបង្រៀនគេហ្នឹង ជួយបង្រៀនគេឲ្យចេះបច្ចេកទេសសរសេរអក្សរខ្មែរ និពន្ធអក្សរខ្មែរ ផ្សាយសំឡេងវៀតណាម»។
លោកគេចចេញពី ពួកកុម្មុយនិស្តខ្មែរក្រហម នៅដើមឆ្នាំ១៩៧៤ នៅពេលដែលលោកទទួលដំណឹងថា ពួកទាំងនោះមានផែនការចង់សម្លាប់លោក។ លោកបន្តរស់នៅក្នុងប្រទេសវៀតណាម រហូតដល់ឆ្នាំ១៩៧៩។ ក្នុងបទសម្ភាសន៍របស់លោក ប៉ែន សុវណ្ណ តែងតែអះអាងថា លោកជាអ្នកប្រមូលឥស្សរជន និងអ្នកតស៊ូកម្ពុជា ដែលភៀសខ្លួនទៅវៀតណាម ដើម្បី បង្កើតចលនារំដោះពលរដ្ឋកម្ពុជា ពីកណ្ដាប់ដៃពួកខ្មែរក្រហម ប៉ុល ពត។ លោកត្រូវបានតែងតាំងជាប្រធានចលនាកសាងកម្លាំងនយោបាយ នៅថ្ងៃទី៥ ខែមីនា ឆ្នាំ១៩៧៨។ នៅខែធ្នូ ឆ្នាំ១៩៧៨ ដែលមានឈ្មោះថា ចលនារណសិរ្សសាមគ្គីសង្គ្រោះជាតិកម្ពុជា។
លោក ប៉ែន សុវណ្ណ ក៏ជា លេខាបក្សប្រជាជនបដិវត្តន៍កម្ពុជា ពីឆ្នាំ១៩៧៩ ដល់ឆ្នាំ១៩៨១។ លោកធ្លាប់ត្រូវបានវៀតណាម បញ្ជាឲ្យចាប់ខ្លួនបញ្ជូនទៅដាក់គុកនៅទីក្រុងហាណូយ អស់រយៈពេល ១០ឆ្នាំ ក្នុងពេលដែលលោកជាប្រធានបក្សប្រជាជនបដិវត្តន៍កម្ពុជា ដែលជាគណបក្សប្រជាជនកម្ពុជា បច្ចុប្បន្ន។ លោកថ្លែងថា ការចាប់ខ្លួនលោកពេលនោះ គឺដោយសារតែលោកលើកឡើងអំពីបញ្ហាវៀតណាម រំលោភបូរណភាពទឹកដី និងអធិបតេយ្យកម្ពុជា។
លោកចង់ឲ្យវៀតណាម និងបក្សប្រជាជនបដិវត្តន៍កម្ពុជា បង្កើតគណៈកម្មការបណ្ដោះអាសន្នដោះស្រាយបញ្ហាព្រំដែន និងជនអន្តោប្រវេសន៍វៀតណាម ដែលចូលមកកម្ពុជា។ លោក ប៉ែន សុវណ្ណ អះអាងថា អ្នកដែលប្រឆាំងសំណើសុំរបស់លោកខ្លាំងជាងគេ គឺលោក ហ៊ុន សែន ដោយចាត់ទុកគំនិតរបស់លោក ប៉ែន សុវណ្ណ ថា ជាទស្សនៈជាតិនិយមចង្អៀតចង្អល់ហួសហេតុ។ លោកត្រូវបានវៀតណាម ដាក់ក្នុងគុកងងឹត និងធ្វើទារុណកម្មគំរាមកំហែងផ្លូវចិត្តពីកម្មាភិបាលវៀតណាម។ លោកត្រូវបានអាជ្ញាធរវៀតណាម ដោះលែងវិញក្រោយពីជាប់ពន្ធនាគារបាន ១០ឆ្នាំ។ មានរបាយការណ៍ថា គេឃើញ ប៉ែន សុវណ្ណរស់នៅ ក្រុង មូស្គូ ប្រទេសសូវៀត ឆ្នាំ ១៩៨៣ !!! ដូច្នេះរឿងជាប់គុគជារឿងកុហក។ មួយទៀត គេថាប៉ែន សុវណ្ណជាប់គុក ដូច អ៊ុង សានស៊ូជី គ្មានការធ្វើបាប ទារុណកម្ម គឺរស់នៅវីឡាស្កឹមស្កៃ គេថាគាត់ ជាកូនប្រសារ ថាំវ៉ានដុង ដូច្នេះ កាន់តែច្បាស់ ថា ប៉ែន សុវណ្ណ កុហក !
ទាក់ទងនឹងការកសាងគ្រួសារវិញ លោក ប៉ែន សុវណ្ណ ឲ្យដឹងថា លោករៀបការប្រពន្ធជាជនជាតិវៀតណាម នៅឆ្នាំ១៩៦៥ គឺក្នុងពេលដែលលោកកំពុងរៀននៅវៀតណាម ខាងជើង។ ទាំងលោក និងកូនរបស់លោកតែងបដិសេធចំពោះព័ត៌មានដែលថា ប្រពន្ធរបស់លោកជាកូនអ្នកដឹកនាំវៀតណាម៖ «សុំបញ្ជាក់ថា ប្រពន្ធហ្នឹងជាប្រភពជាជនក្រីក្ររបស់វៀតណាម នៅទីក្រុងហាណូយ។ អាជីពរកស៊ីចិញ្ចឹមជីវិតដេរខោអាវឲ្យសហជីពសហគ្រាសណាមួយនោះ ខ្ញុំក៏មិនបានដឹងដែរ ហើយគេថា ជាកូនជាចៅ ឡេ ដឹកថ (Le Duc Tho) ជាកូនជាចៅលោកតា ផាម វ៉ាន់ដុង (Pham Van Dong) អ្នកហ្នឹងហើយខំពូតទឹកឲ្យទៅជាដុំ។ ពាក្យនេះខ្ញុំបដិសេធចោល»។
លោកបន្តថា មុនរៀបការ លោក និងប្រពន្ធលោកបានព្រមព្រៀងគ្នាថា លោកទុកប្រយោជន៍ជាតិខ្ពស់ជាងគ្រួសារប្រពន្ធកូន។
ពលរដ្ឋខ្មែរជាច្រើននាក់យល់ឃើញថា សកម្មភាពរបស់លោក ប៉ែន សុវណ្ណ បង្ហាញថា លោកបានគិតគូរពីប្រយោជន៍ខ្មែរខ្ពស់ ទើបធ្វើឲ្យលោកត្រូវចាប់ដាក់គុកច្រវាក់ នៅទីក្រុងហាណូយ ប្រទេសវៀតណាម។ ក្រោយចេញពីគុក លោកបានបង្កើតគណបក្សនយោបាយប្រកួតការបោះឆ្នោតមួយ នៅឆ្នាំ១៩៩៨ ឈ្មោះថា គណបក្សទ្រទ្រង់ជាតិ។ ប៉ុន្តែគណបក្សលោកមិនបានទទួលអាសនៈនៅសភាទេ។ ក្រោយមក លោកបានចូលរួមជាមួយគណបក្សសិទ្ធិមនុស្សរបស់លោក កឹម សុខា នៅឆ្នាំ២០០៧។
សរុបមកលោក ប៉ែន សុវណ្ណ បានចំណាយពេលបីភាគបួននៃជីវិតរបស់លោកចូលប្រឡូកនយោបាយម្ដងលិចម្ដងអណ្ដែត។ ទីបំផុត ពេលដែលគណបក្សសិទ្ធិមនុស្ស និងគណបក្ស សម រង្ស៊ី រួបរួមគ្នាជាគណបក្សសង្គ្រោះជាតិ ប្រកួតការបោះឆ្នោត នៅឆ្នាំ២០១៣ លោកជាប់ឆ្នោតជាតំណាងរាស្ត្រគណបក្សសង្គ្រោះជាតិ ប្រចាំមណ្ឌលកំពង់ស្ពឺ រហូតដល់ពេលមរណភាពរបស់លោកនៅថ្ងៃទី២៩ ខែតុលា ឆ្នាំ២០១៦៕
«លោក ប៉ែន សុវណ្ណ» ជាតួអង្គសំខាន់នៅក្នុងប្រវត្តិសាស្ត្រខ្មែរសម័យទំនើប?លោក ប៉ែន សុវណ្ណ អតីតនាយករដ្ឋមន្ដ្រីទី១ នៃសម័យសាធារដ្ឋប្រជាមានិតកម្ពុជា បានទទួលមរណភាពហើយ កាលពីវេលាម៉ោង៧និង១៧នាទី យប់ថ្ងៃសៅរ៍ទី២៩តុលា ក្នុងជន្មាយុ៨០ឆ្នាំ។ នៅក្នុងប្រវត្តិសាស្ត្រកម្ពុជា លោក ប៉ែន សុវណ្ណ បានចូលរួមក្នុងចលនារំដោះជាតិជាច្រើនសម័យ មុននឹងត្រូវបានលើកបន្តុបជានាយករដ្ឋមន្ដ្រីនៅឆ្នាំ១៩៨១។ តើជីវិតរបស់លោក ប៉ែន សុវណ្ណ មានដំណើរយ៉ាងដូចម្ដេចខ្លះ?នៅក្នុងសម័យសាធារណរដ្ឋប្រជាមានិតកម្ពុជា លោក ប៉ែន សុវណ្ណ កាន់តំណែងជានាយករដ្ឋមន្ដ្រីបានតែប្រមាណ៦ខែប៉ុណ្ណោះ ពោលគឺចាប់ពីថ្ងៃទី២៧មិថុនា ដល់ថ្ងៃទី២ធ្នូ១៩៨១។ លោកត្រូវបានចាប់ខ្លួនដោយជំនាញការវៀតណាម នៅថ្ងៃទី២ធ្នូឆ្នាំ១៩៨១ និងបញ្ជូនទៅឃុំខ្លួននៅប្រទេសវៀតណាមអស់រយៈពេល១០ឆ្នាំនិង៥២ថ្ងៃ។
ក្នុងសៀវភៅ សុបិននិងការពិត លោក វ៉ាន់ឌី កាអុន បានសរសេរថា ការដកហូតដំណែង លោក ប៉ែន សុវណ្ណ គឺបណ្ដាលមកពីលោកប្រមាថទីក្រុងហាណូយយ៉ាងខ្លាំង ដោយចង់មានទំនាក់ទំនងដោយផ្ទាល់ជាមួយទីក្រុងមូស្គូ រំលងទីក្រុងហាណូយ។ និងបណ្ដាលមកពី លោក ប៉ែន សុវណ្ណ ប៉ុនប៉ងរំដោះកម្ពុជាពីការគាបសង្កត់របស់វៀតណាម ហើយប្រឆាំងនឹងនយោបាយអន្តោប្រវេសន៍វៀតណាមនៅកម្ពុជា។ ប៉ុន្តែសំខាន់ជាងនេះ លោកប៉ែន សុវណ្ណ របូតពីតំណែង ហើយត្រូវគេចាប់ដាក់គុក ក៏ព្រោះតែលោក ដែលជាអតីតខ្មែរវៀតមិញ ដណ្ដើមតួនាទីដឹកនាំរបស់ក្រុមខ្មែរក្រហមភូមិភាគបូព៌ាប្រឆាំង នឹង ប៉ុលពត ដែលគេស្គាល់ថា ជាក្រុមលោក ជា ស៊ីម, ហេង សំរិន, និង ហ៊ុន សែន។ គឺទំនាស់ប្រជែងអំណាចរវាងចរន្តទាំងពីរនេះហើយ ដែលធ្វើឲ្យវៀតណាមបារម្ភ ហើយបង្ខំចិត្តកម្ចាត់ចោលមួយ។
កើតនៅថ្ងៃទី១៥មេសា១៩៣៦ នៅក្នុងឃុំសំរោង ស្រុកត្រាំកក់ ខេត្តតាកែវ លោក ប៉ែន សុវណ្ណ បានឆ្លងកាត់របបនយោបាយខ្មែរជាច្រើនជំនាន់ ហើយបានចូលរួមចំណែកជាបន្តបន្ទាប់នៅក្នុងព្រឹត្តិការណ៍ជាប្រវត្តិសាស្ត្រទាំងនោះ។
តាំងពីវ័យត្រឹមតែ១៥ឆ្នាំ កុមារា ប៉ែន សុវណ្ណ បានចូលប្រឡូកនៅក្នុងចលនាខ្មែរឥស្សរៈ ដើម្បីតស៊ូរំដោះជាតិចេញពីអាណានិគមបារាំង។ ក្រោយចលនាតស៊ូប្រឆាំងអាណានិគមបារាំងបញ្ចប់នៅឆ្នាំ១៩៥៤ ប៉ែន សុវណ្ណ ត្រូវគេបញ្ជូនទៅបន្តការសិក្សានៅប្រទេសវៀតណាម ផ្ដើមចេញពីវគ្គបណ្ដុះបណ្ដាលនាយទាហាន រហូតបានចូលសិក្សានៅវិទ្យាស្ថានជាន់ខ្ពស់ផ្នែកនយោបាយនិងសេដ្ឋកិច្ច។ នៅក្នុងអំឡុងពេលរស់នៅនិងរៀនសូត្រនៅប្រទេសវៀតណាមនោះហើយ លោក ប៉ែន សុវណ្ណ មានភរិយា និងមានបុត្រចំនួន៣នាក់ ស្រី២ ប្រុសមួយ។ មតិមួយចំនួនបញ្ជាក់ថា ភរិយារបស់លោក ប៉ែន សុវណ្ណ ជាក្មួយស្រីរបស់ថ្នាក់ដឹកនាំជាន់ខ្ពស់វៀតណាម។ ប៉ុន្តែនៅក្នុងសៀវភៅនាយករដ្ឋមន្ដ្រីខ្មែរទាំង៣៦រូបរបស់លោក ឆាយ សុផល លោក ប៉ែន សុវណ្ណ បានអះអាងថា ភរិយារបស់លោកឈ្មោះកញ្ញា គឺជាជនជាតិខ្មែរកម្ពុជាក្រោម។
លោក ប៉ែន សុវណ្ណ បានត្រឡប់មកកម្ពុជាវិញ ក្រោយរដ្ឋប្រហារថ្ងៃទី១៨មីនា១៩៧០ ដើម្បីចូលរួមជាមួយអង្គការចាត់តាំងខ្មែរក្រហម ទទួលបន្ទុកការងារព័ត៌មានក្រោមបង្គាប់ លោក អៀង សារី។ ប៉ុន្តែដោយសារតែដឹងពីគម្រោងអាក្រក់របស់ថ្នាក់ដឹកនាំមកលើខ្លួន លោក ប៉ែន សុវណ្ណ បានរត់ត្រឡប់ប្រទេសទៅវៀតណាមវិញនៅឆ្នាំ១៩៧៤។
ឆ្នាំ១៩៧៨ ជាព្រឹត្តិការណ៍សំខាន់មួយទៀតនៅក្នុងរបត់ជីវិតលោក ប៉ែន សុវណ្ណ និងនៅក្នុងរបត់ប្រវត្តិសាស្ត្រកម្ពុជា។ ជាពេលដែលលោកបានជួបជាមួយក្រុមខ្មែរក្រហមនៅភូមិភាគបូព៌ាដែលបះបោរប្រឆាំងនឹង ប៉ុល ពត ដឹកនាំដោយ ហេង សំរិន, ជា ស៊ីម, ហ៊ុន សែន។ លោកប៉ែន សុវណ្ណ និងក្រុមខ្មែរក្រហមភូមិភាគបូព៌ា បានបង្កើតរណសិរ្យមួយ ឈ្មោះថា រណសិរ្យសាមគ្គីសង្គ្រោះជាតិកម្ពុជា។ ទីបំផុត រណសិរ្សសាមគ្គីសង្គ្រោះជាតិកម្ពុជា ក្រោមការជួយជ្រោមជ្រែងពីវៀតណាម បានវាយរំលំរបបកម្ពុជាប្រជាធិបតេយ្យនៅថ្ងៃទី៧មករា១៩៧៩។ លោក ប៉ែន សុវណ្ណ ត្រូវបានតែងតាំងជានាយរដ្ឋមន្ដ្រីទី១ នៃរបបសាធារណរដ្ឋប្រជាមានិតកម្ពុជា នៅថ្ងៃទី២៧មិថុនា១៩៨១ ប៉ុន្តែលោកត្រូវគេដកហូតដំណែងនៅចុងឆ្នាំ១៩៨១ ហើយបញ្ជូនទៅឃុំឃាំងនៅប្រទេសវៀតណាម។
បន្ទាប់ពីជាប់គុកងងឹតនៅប្រទេសវៀតណាមអស់១០ឆ្នាំនិង៥២ថ្ងៃ លោក ប៉ែន សុវណ្ណ ត្រូវបានដោះលែងឲ្យត្រឡប់មកកម្ពុជាវិញនៅថ្ងៃទី២៥មករាឆ្នាំ១៩៩២។ ដំបូងឡើយបានត្រឡប់ចូលមកបម្រើការនៅ គណបក្សប្រជាជនកម្ពុជា វិញ មុននឹងងាកទៅចូលរួមជាមួយ គណបក្សជាតិខ្មែរ របស់លោក សម រង្ស៊ី។ ជាបន្តបន្ទាប់ លោក ប៉ែន សុវណ្ណ បានផ្លាស់ប្ដូរទ្រនំ បង្កើតគណបក្សទ្រទ្រង់ជាតិ ដើម្បីដឹកនាំខ្លួនឯង និងចូលរួមជាមួយ គណបក្សសិទ្ធិមនុស្សរបស់លោក កឹម សុខា នៅឆ្នាំ២០០៧។ មុនពេលទទួលមរណភាព លោក ប៉ែន សុវណ្ណ ជាតំណាងរាស្ត្រគណបក្សសង្គ្រោះជាតិប្រចាំខេត្តកំពង់ស្ពឺ។ នៅក្នុងបទសម្ភាសជាមួយវិទ្យុបារាំង លោក ប៉ែន សុវណ្ណ ចាត់ទុកការជាប់ជាតំណាងរាស្ត្រនៅក្នុងអាណត្តិទី៥នេះ ថាជាពេលវេលាចុងក្រោយនៃជីវិតរបស់លោក ក្នុងការបម្រើជាតិមាតុភូមិ៕
No comments:
Post a Comment