គណបក្សជាតិនិយម
គណបក្សជាតិនិយម អតីតគណបក្សដែលបែកចេញពីគណបក្សនរោត្តម រណឬទ្ធិ បានប្រកាសមិនចូលរួមការបោះឆ្នោតជាតិ នៅថ្ងៃទី ២៩ ខែកក្កដា ខាងមុខនេះទេ។ សម្ព័ន្ធអតីតគណបក្សប្រឆាំងមួយនេះ បានលើកមូលហេតុថា ការបោះឆ្នោតខាងមុខជាការបោះឆ្នោតក្លែងក្លាយ។ សូមបញ្ជាក់ថា គិតមកទល់នឹងថ្ងៃទី ១២ ឧសភានេះ មានគណបក្សនយោបាយចំនួន៥ហើយ ដែលប្រកាសមិនចូលរួមការបោះឆ្នោត ខណៈគណបក្សនយោបាយចំនួន៣បានចុះឈ្មោះជាផ្លូវការនៅ គជប។
គណបក្សជាតិនិយមដែលគេដឹងថា ជាគណបក្សដែលមានសម្ព័ន្ធភាពជាមួយអតីតគណបក្សសង្គ្រោះជាតិ បានប្រកាសជំហរមិនចូលរួមការបោះឆ្នោតជាតិ នៅថ្ងៃទី ២៩ កក្កដា ខាងមុខនេះទេ។ មូលហេតុ គឺដោយសារតែគណបក្សដែលបែកចេញពីអតីតគណបក្សហ្វ៊ុនស៊ិនប៉ិច បន្ទាប់មកគណបក្ស នរោត្តម រណឬទ្ធិ មួយនេះ ចាត់ទុកថា ការបោះឆ្នោតជាតិដែលប្រព្រឹត្តទៅនៅខែកក្កដាខាងមុខនេះ គឺជាការបោះឆ្នោតក្លែងក្លាយ។ ក្លែងក្លាយ ត្បិតការបោះឆ្នោតរដ្ឋសភាអាណត្តិទី៦នេះ មិនមានការចូលរួមពីអតីតគណបក្សសង្គ្រោះជាតិ ដែលជាគណបក្សប្រឆាំងធំជាងនៅកម្ពុជា។
យោងតាមសេចក្តីថ្លែងការណ៍របស់ខ្លួន ចុះថ្ងៃទី ១១ ឧសភា គណបក្សជាតិនិយមបានទាមទារឲ្យមានការពិនិត្យឡើងវិញ នូវច្បាប់និងលិខិតបទដ្ឋានគតិយុត្តិ ដែលជាឧបករណ៍បំរើការបោះឆ្នោតតាមគោលការណ៍ប្រជាធិបតេយ្យ សេរីពហុបក្ស ដើម្បីធានាឲ្យមានភាពស្មើគ្នានៅចំពោះមុខច្បាប់។ បន្ថែមលើនេះ គណបក្សបានទាមទារឲ្យមានការដោះស្រាយវិបត្តិនយោបាយរវាងភាគីពាក់ព័ន្ធជាមុនសិន ដើម្បីសំដៅឲ្យការបោះឆ្នោតជាតិនៅខែកក្កដាខាងមុខនេះ ប្រព្រឹត្តិទៅដោយសេរី ត្រឹមត្រូវ យុត្តិធម៌ និងអាចជឿទុកចិត្តបាន ដែលឆ្លុះបញ្ចាំងពីឆន្ទៈប្រជាពលរដ្ឋពិតប្រាកដ។ នេះបើយោងតាមសេចក្តីថ្លែងការណ៍។
គួរជំរាបជូនថា គណបក្សជាតិនិយម គឺជាគណបក្សដែលបែកចេញពីគណបក្សនរោត្តម រណឬទ្ធិ របស់ព្រះអង្គម្ចាស់នរោត្តម រណឬទ្ធិ ដែលធ្លាប់ចូលរួមការបោះឆ្នោតអាណត្តិកន្លងមក ហើយទទួលបានអាសនៈរដ្ឋសភានៅឆ្នាំ២០០៨ មុនពេលដែលគណបក្សនរោត្តម រណឬទ្ធិ បានប្តូឈ្មោះមកជាគណបក្សជាតិនិយមនៅឆ្នាំ២០០។ គណបក្សនេះ ធ្លាប់បានឈ្នះអាសនៈក្រុមប្រឹក្សារាជធានីខេត្តក្រុង ស្រុកខណ្ឌ កាលពីឆ្នាំ២០០៩ និងក្រុមប្រឹក្សាឃុំ-សង្កាត់នៅឆ្នាំ២០០៧និងឆ្នាំ២០១២កន្លងទៅ។ បន្ទាប់មក គណបក្សជាតិនិយម ដែលបច្ចុប្បន្នដឹកនាំដោយលោកមេធាវី ផែង ហេង បានចូលរួមជាមួយគណបក្សសង្គ្រោះជាតិនៅឆ្នាំ២០១៤ ដើម្បីចូលរួមការបោះឆ្នោតជ្រើសរើសក្រុមប្រឹក្សារាជធានីខេត្តក្រុង ស្រុកខណ្ឌ កន្លងមកនេះ។
គួរជំរាបជូនដែរថា គិតមកទល់នឹងថ្ងៃទី ១២ ឧសភានេះ មានគណបក្សនយោបាយចំនួន៥ហើយ ដែលបានប្រកាសធ្វើពហិការ មិនចូលរួមបោះឆ្នោតជាតិនៅខែកក្កដាខាងមុខ គឺគណបក្សភ្លើងទៀន អតីតគណបក្ស សម រង្ស៊ី, គណបក្សសិទ្ធិមនុស្ស គណបក្សអំណាចខ្មែរ គណបក្សមហាសាមគ្គីជាតិខ្មែរ និងចុងក្រោយនេះ គឺគណបក្សជាតិនិយមរបស់លោក ផែង ហេង អតីតមេធាវីការពារក្តីឲ្យលោក កឹម សុខា។
ទោះបីជាគណបក្សទាំង៥ខាងលើបានធ្វើពហិការក្តី ប៉ុន្តែគិតត្រឹមរសៀលថ្ងៃទី ១២ ឧសភានេះ មានគណបក្សនយោបាយចំនួន៩ហើយ ដែលបានចុះឈ្មោះ និងចុះបញ្ជីបេក្ខជននៅ គ.ជ.ប ក្នុងនោះមានគណបក្សនយោបាយចំនួន៣ ដែលទទួលស្គាល់ជាផ្លូវការ ដោយ គជប រួមមាន គណបក្សយុវជនកម្ពុជា គណបក្សប្រជាជនកម្ពុជា និងគណបក្សសញ្ជាតិកម្ពុជា។ ក្រៅពីនោះ នៅមានគណបក្សនយោបាយចំនួន ៨ ទៀត ដែលកំពុងបំពេញលក្ខខណ្ឌតម្កល់ប្រាក់១៥លានរៀលនៅរតនាគារជាតិ ខណៈគណបក្ស៦ផ្សេងទៀត បានមកទទួលទម្រង់ ១០០៨ ពាក្យសុំចុះបញ្ជីពី គជប។ ការចុះបញ្ជីឈ្មោះគណបក្សនយោបាយ និងបេក្ខជនឈរឈ្មោះបោះឆ្នោត នឹងត្រូវបិទបញ្ចប់នៅវេលាម៉ោង៥និង៣០នាទីល្ងាច ថ្ងៃទី ១៤ ឧសភា ដើមសប្តាហ៍ក្រោយនេះ៕
បក្សជាតិនិយមចូលរួមជាមួយបក្សសង្គ្រោះជាតិគណបក្សជាតិនិយម ចូលរួមជាមួយគណបក្សសង្គ្រោះជាតិ ក្នុងគោលដៅរួបរួមគ្នារវាងអ្នកប្រជាធិបតេយ្យ ដើម្បីផ្លាស់ប្ដូររដ្ឋបាលថ្នាក់មូលដ្ឋាន។
អគ្គលេខាធិការគណបក្សជាតិនិយម លោក មុត ចន្ថា បានថ្លែងប្រាប់អ្នកសារព័ត៌មាន កាលពីថ្ងៃទី៧ មេសា នៅខាងមុខទីស្នាក់ការគណបក្សសង្គ្រោះជាតិ ថា ទាំងថ្នាក់ដឹកនាំ និងអ្នកគាំទ្រគណបក្សជាតិនិយម បានយល់ស្របចូលរួមជាមួយគណបក្សសង្គ្រោះជាតិ ដោយចាប់ផ្ដើមពីការចូលរួមក្នុងបញ្ជីបោះឆ្នោតគណបក្សសង្គ្រោះជាតិ សម្រាប់ការបោះឆ្នោតនៅមូលដ្ឋាន៖ «យើងជាអ្នកប្រជាធិបតេយ្យ ហើយធ្វើការទីទៃជាគ្នាវាជាការបំបែកកម្លាំង។ យើងឈរបោះឆ្នោតតែឯកឯង យើងឈ្នះជាលក្ខណៈឯកជន មិនមែនដើម្បីជាតិ។ អ្វីដែលយើងសម្រេចចិត្តហ្នឹង គឺបោះឆ្នោតក្នុងបញ្ជីគណបក្សសង្គ្រោះជាតិ ដើម្បីរួមកម្លាំងផ្លាស់ប្ដូរនៅមូលដ្ឋាន។ សំខាន់ គឺផ្លាស់ប្ដូរនៅរដ្ឋបាលថ្នាក់ក្រោមបំផុត ពិសេសបោះឆ្នោតក្រុមប្រឹក្សាឃុំសង្កាត់ឆ្នាំ២០១៨»។
ទាក់ទិននឹងករណីនេះ ប្រធានគណបក្សសង្គ្រោះជាតិ លោក សម រង្ស៊ី បានថ្លែងថា គណបក្សសង្គ្រោះជាតិ ស្វាគមន៍ការចូលរួមរបស់គណបក្សជាតិនិយម និងចាត់ទុកករណីនេះថា ជាការរួបរួមរបស់អ្នកប្រជាធិបតេយ្យ ដើម្បីសម្រេចជោគជ័យក្នុងការបោះឆ្នោត ជាពិសេសការបោះឆ្នោតនៅមូលដ្ឋាន៕
No comments:
Post a Comment