Fri, 28 November 2014
ប៉ិច សុធារី
ភ្នំពេញៈ កម្ពុជា នឹងដាក់សំណើទៅអង្គការយូណេស្កូ សុំចុះឈ្មោះប្រាសាទសំបូរព្រៃគុក ទៅជាសម្បត្តិបេតិកភណ្ឌពិភពលោកនៅដើម ឆ្នាំ២០១៥ ខាងមុខនេះខណៈដែលក្រសួងកំពុងត្រៀមឯកសារដាក់ប្រាសាទបន្ទាយឆ្មារ និងចាប៉ីដងវែង ចូលជាសម្បត្តិបេតិកភណ្ឌពិភពលោកដូចគ្នាផងដែរ។
រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានថ្លែងនៅរដ្ឋសភា បន្ទាប់ពីឆ្លើយបំភ្លឺពាក់ព័ន្ធនឹងបញ្ហាវប្បធម៌ និងសិល្បៈ កាលពីរសៀលថ្ងៃពុធថា តាមគោលនយោបាយជាអាទិភាពរបស់ក្រសួងសម្រាប់ ឆ្នាំ២០១៥ គឺការចុះបញ្ជីសារពើភណ្ឌនូវបេតិកភណ្ឌរូបិយ និងអរូបិយទាំងអស់ ដែលមាននៅកម្ពុជា ក្នុងនោះ ប្រាសាទសំបូរព្រៃគុក នឹងត្រូវដាក់សំណើចុះបញ្ជីជាបេតិកភណ្ឌពិភពលោកនៅអង្គការយូណេស្កូ នាដើម ឆ្នាំ២០១៥ នេះ។
លោកស្រីបានថ្លែងថា៖ «យើងបានរៀបចំឯកសារបានច្រើនហើយ...អ៊ីចឹងដើម្បីចង់ការពារទាល់តែយើងមានការចុះបញ្ជី ដូច្នេះហើយ កាលណាយើងមាន បើសិនគេលួច យើងអាចរកឃើញវិញ ហើយជាសម្បត្តិរបស់យើងតែម្តង»។
ប្រាសាទសំបូរ ព្រៃគុក គឺជារមណីយដ្ឋានវប្បធម៌ និងប្រវត្តិសាស្ត្រមួយ មានទីតាំងឋិតនៅក្នុង ភូមិ-ឃុំសំបូរ ស្រុកប្រាសាទសំបូរ ចម្ងាយ ៣៧ គីឡូម៉ែត្រ ពីទីរួម ខេត្តកំពង់ធំ។ ប្រាសាទសំបូរព្រៃគុក កសាងឡើងនៅរាជ្ជកាលស្តេចឥសានវរ្ម័ន ទី១ ក្នុងសតវត្សរ៍ ទី៧ (គស ៦១៦-៦៣៥) នាសម័យចេនឡា។ ក្នុងការកាប់ឆ្ការព្រៃគេបានរកឃើញ ប្រាសាទទាំងអស់ចំនួនប្រមាណ ១៤០ ប្រាសាទនៅក្នុងរមណីយដ្ឋានមួយនេះ។
លោកស្រី សកុណា បានបន្តថា បន្ទាប់ពីការចុះឈ្មោះប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោក កម្ពុជាក៏បាននិងកំពុងរៀបចំឯកសារ ដើម្បីដាក់ប្រាសាទបន្ទាយឆ្មារ និងទម្រង់សិល្បៈបុរាណ «ចាប៉ីដងវែង» ទៅក្នុងសម្បត្តិបេតិកភណ្ឌពិភពលោកក្នុងអំឡុង ឆ្នាំ២០១៥ ខាងមុខនេះផងដែរ។
ប្រាសាទបន្ទាយឆ្មារ មានទីតាំងនៅ ស្រុកពួក ខេត្តបន្ទាយមានជ័យ ត្រូវបានកសាងឡើងនៅចុងសតវត្សរ៍ ទី១២ និងដើមសតវត្សរ៍ ទី១៣។
ចំណែក ចាប៉ីដងវែង ជាឧបករណ៍ភ្លេងមានខ្សែ ២ ឬ ៤ ដែលប្រើសម្រាប់ប្រគំក្នុងវង់ភ្លេងការបុរាណ វង់ភ្លេងអារក្ស វង់ភ្លេងមហោរីជាដើម និងប្រើទោលសម្រាប់លេងកំដរចម្រៀងកំណាព្យ។
កម្ពុជាបានដាក់ប្រាសាទជាច្រើន ទៅក្នុងសម្បត្តិបេតិកភណ្ឌពិភពលោករួចហើយក្នុងនោះ ក៏មានប្រាសាទព្រះវិហារនិងអង្គរវត្តផងដែរ៕
No comments:
Post a Comment