Wednesday, July 19, 2017

ប្រទះ​ឃើញ​ក្បាល​អសុរៈ​សម័យ​អង្គរ ៣

ក្បាល​យក្ស​ដែល​គេ​ជីក​ប្រទះ​ឃើញ​នៅ​ក្នុង​ដី នៅ​បរិវេណ​ប្រាសាទ​បន្ទាយ​ឆ្មារ កំពុង​ត្រូវ​បាន​ស្ទូច​ចេញ​ពី​រណ្តៅ​ដោយ​ប្រុង​ប្រយ័ត្ន​កាល​ពី​ថ្ងៃ​អាទិត្យ។ រូបថត សហការី
Tue, 18 November 2014
ផាក់ ស៊ាងលី
ភ្នំពេញប៉ុស្តិ៍

បន្ទាយ​មាន​ជ័យៈ រូប​ក្បាល​យក្ស​សម័យ​អង្គរ​ចំនួន​បី ត្រូវ​បាន​ប្រទះ​ឃើញ​ជា​បន្ត​បន្ទាប់​នៅ​បរិវេណ​ប្រាសាទ​បន្ទាយ​ឆ្មារ បន្ទាប់​ពី​បាក់​ធ្លាក់​កប់​ទៅ​ក្នុង​ដី​ជា​ច្រើន​ទសវត្សរ៍​មក។

មន្រ្តី​ក្រសួង​វប្បធម៌​និង​វិចិត្រ​សិល្បៈ រួម​នឹង​អាជ្ញាធរ​មូលដ្ឋាន ស្រុក​បន្ទាយ​ឆ្មារ ខេត្ត​បន្ទាយ​មាន​ជ័យ បាន​ធ្វើ​ពិធី​បើក​ការដ្ឋាន​ជួស​ជុល​ខ្លោង​ទ្វារ​ទិស​ខាង​កើត ជើង និង​ត្បូង​នៅ​ប្រាសាទ​បន្ទាយ​ឆ្មារ កាល​ពី​ថ្ងៃ​សុក្រ​សប្តាហ៍​មុន ក្រោម​គម្រោង​ថវិកា​របស់​រដ្ឋាភិបាល​កម្ពុជា។


ក្បាល​យក្ស​ដែល​គេ​ជីក​ប្រទះ​ឃើញ​នៅ​ក្នុង​ដី នៅ​បរិវេណ​ប្រាសាទ​បន្ទាយ​ឆ្មារ កំពុង​ត្រូវ​បាន​ស្ទូច​ចេញ​ពី​រណ្តៅ​ដោយ​ប្រុង​ប្រយ័ត្ន​កាល​ពី​ថ្ងៃ​អាទិត្យ។ រូបថត សហការី
ក្រសួង​ក៏​បាន​ធ្វើ​កំណាយ​ទៅ​ក្នុង​ដី​នៅ​ម្តុំ​ខ្លោង​ទ្វារ​ផ្លូវ​ចូល​ប៉ែក​ខាង​កើត​ប្រាសាទ (ស្ពាន​ហាល) ហើយ​ក៏​បាន​ប្រទះ​ឃើញ​រូប​ក្បាល​អសុរៈ​ឬ​យក្ស (ក្នុង​រឿង​កូរ​សមុទ្រ​ទឹក​ដោះ) ចំនួន​បី ចាប់​តាំង​ពី​ថ្ងៃ​សុក្រ​ដល់​ថ្ងៃ​អាទិត្យ​សប្តាហ៍​កន្លង​មក​នេះ។ នេះ​បើ​តាម​ប្រសាសន៍​លោក ម៉ៅ ស៊ី ដែល​ជា​មន្រ្តី​ជាប់​កិច្ច​សន្យា​នៃ​នាយកដ្ឋាន​គាំពារ និង​អភិរក្ស​សំណង់​បុរាណ​នៃ​ក្រសួង​វប្បធម៌​និង​វិចិត្រ​សិល្បៈ ដែល​បាន​ប្រាប់ ភ្នំពេញ ប៉ុស្តិ៍ កាល​ពី​ម្សិល​មិញ។

លោក ម៉ៅ ស៊ី បាន​បញ្ជាក់​ថា៖ «ក្បាល​យក្ស​រក​ឃើញ​ទាំង​អស់​បី តែ​មួយ​បាន​បែក​បាក់ ខូច​មុខ​ខូច​មាត់​ទៅ​ហើយ។

ពីរ​នៅ​ល្អ​ទាំង​អស់។ ក្បាល​យក្ស តួ​ខ្លួន និង​ថ្ម​មួយ​ចំនួន​បាន​បាក់ និង​កប់​ក្នុង​បាត​ដី​ជាច្រើន​ឆ្នាំ ដោយ​សារ​មាន​ទឹក​លិច​ផង​ដែរ»។ លោក​បាន​បន្ត​ថា ស្ពាន​ហាល​នេះ​ត្រូវ​បាន​កសាង​ឡើង​នៅ​ចុង​សតវត្សរ៍ ទី១២ ក្នុង​សម័យ​អង្គរ​ដោយ​ព្រះ​បាទ​ជ័យ​វរ្ម័ន ទី៧ ដូច​គ្នា​ទៅ​នឹង​ចម្លាក់​នៅ​ខ្លោង​ទ្វារ​ប្រាសាទ​បាយ័ន ដែរ។ ចំពោះ​រូប​ក្បាល​យក្ស មិន​បាក់​បែក​នោះ​នឹង​អាច​យក​ទៅ​ផ្គុំ​ជាមួយ​នឹង​ដង​ខ្លួន​ដែល​នៅ​សេស​សល់ ហើយ​ក្រុម​ការងារ​នឹង​ខិតខំ​បន្ត​កំណាយ​រក​ផ្នែក​ផ្សេងៗ​ទៀត​ដែល​បាត់បង់។ រូប​ក្បាល​អសុរៈ​នេះ​គឺជា​ផ្នែក​មួយ​នៃ​ដង​ខ្លួន​ក្រុម​អសុរៈ​ដែល​កំពុង​តែ​ទាញ​ពស់​នាគរាជ​ម្ខាង​ម្នាក់​ជាមួយ​នឹង​ក្រុម​ទេវៈ (ទេវតា) នៅ​ក្នុង​រឿង​កូរ​សមុទ្រ​ទឹក​ដោះ​បុរាណ ដើម្បី​ដណ្តើម​យក​ទឹក​អម្រឹត។ រូប​នេះ ក៏​ឃើញ​មាន​ផង​ដែរ​នៅ​តំបន់​ប្រាសាទ​អង្គរវត្ត​ក្នុង ខេត្ត​សៀមរាប។ ប៉ុន្តែ​នៅ​ប្រាសាទ​បន្ទាយ​ឆ្មារ ក្នុង ខេត្ត​បន្ទាយ​មាន​ជ័យ ឯ​នោះ​វិញ បាន​បែក​បាក់​អស់​ទៅ​ហើយ។


អ្នក​ជំនាញ​កំពុង​វាស់​ក្បាល​យក្ស​មួយ​ក្នុង​ចំណោម​ក្បាល​យក្ស​បី​ដែល​គេ​ជីក​ប្រទះ​ឃើញ។ រូបថត សហការី
ការ​បែក​បាក់​នេះ ត្រូវ​បាន​លោក ម៉ៅ ស៊ី ផ្តល់​ហេតុ​ផល​ថា គឺ​ដោយ​សារ​តែ​សង្រ្គាម​ការ​ទុក​ចោល​យូរ​គ្មាន​ការ​ថែរក្សា​និង​គ្រោះ​ធម្មជាតិ ដូច​ជា​ទឹក​ជំនន់ និង​កម្រិត​ទឹក​ហូរ​ប៉ះ​ខ្លាំង​ដែល​បណ្តាល​ឲ្យ​ស្ពាន​ហាល​បាក់​ស្រុត​ជាដើម។ លោក ស៊ី បាន​ថ្លែង​ថា៖ «បើ​សិន​មិន​កប់​ជ្រៅ​ទេ បើ​នៅ​ល្អ​ប្រាកដ​ជា​ត្រូវ​គេ​លួច​កាត់​លក់​ទៅ​ក្រៅ​ប្រទេស​អស់​ហើយ​មិន​នៅ​ទេ។ វត្ថុ​ទាំង​នេះ​ចាត់​ទុក​ថា មាន​សំណាង​ដែល​មិន​ត្រូវ​បាន​គេ​លួច​នោះ»។

កាល​ចុង ខែ​តុលា ក្រុម​កំណាយ​ក៏​បាន​ប្រទះ​ឃើញ​ឆ្អឹង​មនុស្ស​នៅ​ខ្លោង​ទ្វារ​ខាង​ត្បូង​ប្រាសាទ​បន្ទាយ​ឆ្មារ​ផង​ដែ។ ប្រាសាទ​បន្ទាយ​ឆ្មារ​មាន​ទីតាំង​ស្ថិត​នៅ ឃុំ​បន្ទាយ​ឆ្មារ ស្រុក​ថ្ម​ពួក ខេត្ត​បន្ទាយ​មាន​ជ័យ ដែល​ត្រូវ​បាន​កសាង​នៅ​ចុង​សតវត្សរ៍ ទី១២ និង​ដើម​សតវត្សរ៍ ទី១៣ ដោយ​ព្រះ​បាទ​ជ័យ​វរ្ម័ន ទី៧។

លោក គិត សុគុន សមាជិក​សហគមន៍​ទេសចរណ៍​បន្ទាយ​ឆ្មារ បាន​ឲ្យ​ដឹង​ថា សហគមន៍​លោក​ទទួល​បាន​ភ្ញៀវ​ជាតិ​និង​អន្តរជាតិ​ទៅ​ទស្សនា​ប្រាសាទ​បន្ទាយ​ឆ្មារ ប្រមាណ ៧០០ នាក់​ក្នុង​មួយ​ឆ្នាំៗ។ លោក​សង្ឃឹម​ថា ចំនួន​ភ្ញៀវ​ទេសចរ​នឹង​កើន​ឡើង​ទៀត​នៅ​ពេល​មាន​ភ្លើង​អគ្គិសនី​ចូល​ទៅ​ដល់​នៅ​ឆ្នាំ​ក្រោយ​ហើយ​ស្ពាន​ហាល និង​ផ្លូវ​ចូល​ទៅ​ប្រាសាទ​ត្រូវ​បាន​បាន​ជួល​ជុល​ឡើង​វិញ៕

No comments:

Post a Comment